Page 77 - AHATA

Sr. Richard Arends ta sigui bisa cu proyectonan aki ta wordo financia internacionalmente,
pues argumentonan treci dilanti pa partidonan den coalicion ta totalmente infunda.

“Nacionan Uni a hasta establece un Centre of Excellence aki na Aruba cu lo a exporta e
formula aki pa otro islanan chikito y den desaroyo. E sistema unda un consorcio ta
diseña, financia, construi, maneha, opera y mantene a prueba di t’e mihor manera pa
paisnan y islanan chikito logra proyectonan grandi riba tereno di infrastructura y
desaroyo urbano.”

Pa loke ta trata e proyectonan investiga den e raport di BoAruba, por bisa cu mayoria di
nan tabata ta como ‘prefunded’, es decir, cu tabatin fondonan disponible pa nan di
antemano.

“E proyectonan aki a wordo cubri dor di presupuesto, TPEF y FDA unda hunto cu
Hulanda a re-aloca 200 miyon di florin pa revitalisacion di nos centro di ciudad.

Ambos proyectonan tabata forma parti di e Plan di Inversion di Gabinetenan Mike Eman
cu fin di crea cupo di trabou, mehora calidad di nos infrastructura y ciudadnan y tambe
jumpstart nos economia despues di e recesion cu a dura te 2010.

Segun Parlamentario Arends, e dos raportnan cu tabata al caso pa atende tabata esun di
maneho di subsidio y esun di overtime.

E recomendacionnan di Rekenkamer lo contirbui di manera structural pa aumenta
eficiencia y reduci gastonan di aparato gubernamental.

Tanto CAFT (october 2019), IMF (november 2019) y Rekenkamer (januari 2020) a saca
nan conclusionan riba e causanan di overtime den Gobierno y con pa contra-aresta esaki.

“Te dia di awe no a splica kico lo haci pa reduci esaki di un manera structural.”

Parlamentario Richard Arends ta conclui bisando cu no tabata mucho cla kico meta di e
reunion di siman pasa tabata y unico splicacion tabata cu esaki tabata un reunion
meramente politico unda esnan cu ta den Gobierno awor tira tur culpa riba Gobierno
anterior pa nan falta di conocemento y capacidad di goberna y hiba un maneho coherente.