Page 34 - AWEMAINTA

34 AWEMainta Diaranson, 25 October 2017

Noticia Internacional

Diki t’e triki! Conoce e centro turistico

exclusivamente pa hende obeso na Bahamas

UN canal di television britanico a dicidi di transmiti un programa
unda ta mustra un grupo di persona disfrutando di un resort cu
e nomber “Club 18 to 30 Stone” den e unico hotel size XL di
mundo cu a duna bon bini na su prome huesped for di Inglatera.

E Resort, situa den e isla paradisiaco di Eleuthera na Bahamas,
busca di habri un mercado turistico cu focus den esnan di size
grandi cu ta busca pa bay cu vakantie na lugarnan turistico
convencional, pero cu no ta rondona di hende cu ta critica nan
grandura y peso.

Pa logra cu e turistanan ta sinti nan mes confortabel, e propietario
di e hotel a percura p’e resort aki tin suficiente espacio.
Ekipa cu poolnan di gran espacio cu por soporta hopi peso, e hotel
aki tin un decoracion hopi atractivo y colorido.

Mientras cu e camanan king size a wordo reforsa cu heronan pa
evita cu nan lo kibra, y asina garantisa cu esnan cu ta hospeda
eynan no lo tin cu pasa un experiencia desagradabel ora di drumi.

E compleho turistico aki ta un zona liber di critica, loke ta nifica
cu e turistanan por sinti nan mes liber di cana manera cu nan
kier y bisti con cu nan kier, sin worry cu critica di otro hendenan.
Pero tambe e resort aki ta invita su huespednan pa no tene cuenta
cu loke nan ta come y ni ki cantidad nan ta come, pasobra nan
ta sirbi un ‘all you can eat’ buffet 3 bes pa dia.