Page 23 - min.jus july 7

Sindicato SEPPA ta haya cu Director di KIA ta arogante y
dictatorial

Publication: Tuesday, 7 July 2015. Categoria: General

Malcontento cu e situacion na Prison

ORANJESTAD(AAN): Cos no ta moviendo suave den Prison na Aruba! Por sinti un tension
entre trahadornan.

Awor a sali na cla, cu te ainda SEPPA no ta satisfecho cu loke ta worde haci na KIA pa e
malcontento cu tin bou di e miembronan di SEPPA.

Den entrevista cu Edmundo Marlin, Secretario di Organizacion di e sindicato SEPPA, el a
expresa cu berdad nan no a sali mucho den publicidad cu tur e malcontento pasobra nan ta
prefera di sinta na mesa y dialogo prome cu yega na tuma decisionnan mas drastico.

Marlin a splica cu desde januari cu a nombra un director nobo, SEPPA tabatin solamente un
encuentro pa cera conoci. Den e encuentro ey a keda stipula un acuerdo pa reunion structural, tur
luna, pa atende tur asunto cu ta regarda KIA.

Pero, el a bisa, e sindicato a worde informa door di e shopsteward cu e director dado momento a
duna ordo cu e overtimenan lo no worde paga. SEPPA a dicidi di expresa nan preocupacion y
malcontento oficialmente por escrito den un carta cu a worde manda e director di e instituto.

Den e carta tambe ta pidi e director di KIA un reunion pa haya claridad riba e informacionnan cu
e sindicato a ricibi. “Ta parce cu e señora aki no tabata mucho di acuerdo cu e carta cu nos a
manda y a bisa cu tanten cu SEPPA no rectifica e carta, e lo no sinta cu SEPPA. Pues for di e
tempo ey, 11 di februari 2015, no tin ningun sorto di contacto cu e señora aki.”

SEPPA debi na e situacion ariba menciona, a cuminsa tuma contacto y coresponde directamente
cu e Minister encarga, Arthur Dowers, y mirando e situacion, a papia cu e mandatario di e
preocupacion y cu si e director no kier sinta cu e sindicato, e ora ta e mandatario mester sinta cu
SEPPA. Pesey for di e tempo ey, no a sinta cu e director mas.

Pero asina mes nan a scuche ta papia di un maneho nobo di “ziekteverzuim” cu el a informa
SEPPA di dje, pero cu e sindicato ta nenga rotundamente di a ricibi. “Niun momento e maneho
nobo cu el a bini cune el a duna SEPPA pasobra ni contacto e no kier tin cu e sindicato aki,”
Marlin a splica.

E situacion cu e director a pidi rectificacion di prome carta di SEPPA ta algo cu e sindicato ta
haya ridiculo, pasobra ta un reunion a pidi pa haya aclaracion riba cierto aspectonan di
preocupacion. E ta algo cu solamente e director por aclaria pa trece trankilidad den e
organizacion.

E escenario actual ta cu e sindicato a worde informa door di su miembronan, por medio di un
carta, cu nan tin en total 16 punto di preocupacion. Directiva di SEPPA a analisa e carta y e
puntonan pa mira si tur ta valido. Na final a manda 11 punto di e empleadonan pa Minister
Dowers y a pidi e mandatario pa un reunion.