Page 23 - AM240416
P. 23
Diamars, 16 April 2024 AWEMainta POLITICA 23
Lider di Fraccion di MEP, Hendrik Tevreden:
Tur instrumento cu por midi impacto di maneho
ta importante pa gobierno por inverti den nan
DIA 8 di april Minister di economia Sr. Geoffrey
Wever a duna un presentacion na Parlamento di
Aruba hunto cu Economisch Bureau Amsterdam
cual a elabora riba e proceso pa traha un modelo
di poder di compra (“koopkrachtmodel”) pa Aruba.
Parlamentario y Lider di Fraccion di MEP, Hendrik
Tevreden, a duna di conoce cu den e reunion a uza
tecnologia di video pa por a comunica cu Amsterdam,
y esaki no a bay suficiente bon, di cual a haci cu
tin di ripiti e reunion aki den forma personal pa por
profundisa mas riba e modelo presenta.
Tevreden a indica cu un “koopkrachtmodel” ta
un instrumento cual ta midi e posibel impacto di
cambio di maneho di Gobierno specificamente riba
e poder di compra di ciudadanonan na Aruba.
Maske Pais Aruba ta dispone di modelo MARUBA pa
hopi tempo caba, segun Minister Wever e modelo
macro-economico MARUBA ta limita solamente na
maneho actual, y no ta posibel pa midi e impacto
di cambio di maneho di Gobierno riba e poder di
compra di ciudadanonan y hogarnan na Aruba.
P’esey ta na su luga pa introduci un instrumento
asina aki.
“Nos tur ta desea pa e poder di compra di tur nos
ciudadanonan mehora. Pa yega na cumpli cu e meta
aki, ta mas cu un cos tin di tene cuenta cu ne. Y
un instrumento manera e “koopkrachtmodel” cu
por midi e efecto di cambio di maneho cu Gobierno
ta pensa pa ehecuta prome cu e drenta practica. E
no ta un garantia tur biaha, pero si e ta aumenta e
probabilidad di logra e meta proponi. E punto ta cu
tur instrumento cu por midi impacto di maneho ta
importante pa gobierno inverti den nan. Incluso uno
cu lo por beneficia e poder di compra di hogarnan
na Aruba”, Parlamentario Hendrik Tevreden a duna
di conoce.
“Mi ta desea Minister Wever exito den e proceso y
nos na parlamento ta keda pendiente pa cu e bishita
personal di Economisch Bureau Amsterdam cual lo
mester bini parlamento pa elabora mas profundo
riba e modelo di poder di compra aki”, Parlamentario
Tevreden a expresa.
