Page 21 - MIN SJA 7 NOV 2015

30 AWEMainta Diasabra, 07 November 2015

Te ainda Gobierno no a cay, pero

No por por traha
cu minoria den
Parlamento, ora

cu Marilyn Moses
(PAIS) a retira su

sosten

WILLEMSTAD - E situacion politico na Corsou ta

confuso. For di prome oranan di mainta, informacion
cu a bin for di Corsou, ta bisa cu Gabinete Whiteman
a cay. Loke de facto no ta berdad, pero si t’asina cu
Gabinete Whiteman no ta goza di sosten di mayoria mas
den Parlamento. Pasobra e miembro di partido PAIS,
Marilyn Moses a duna di conoce cu e no ta sostene su
partido mas y ta declara su mes como independiente den
Parlamento. Loke nifica cu Gobierno actual tin sosten di
10 asiento di 21, cu ta minoria.

Te cu ayera tardi, ningun vocero di Gabinete Whiteman
a sali duna un declaracion oficial di e situacion reinante.
Tampoco partido PAIS, di cual Marilyn Moses tabata
miembro, no a duna ningun declaracion tampoco.
Pero logica ta bisa cu si un Gobierno, no ta goza di sosten
di mayoria mas, cu Gabinete Whiteman lo tin cu entrega
su retiro na Gobernador of wak si tin posibilidad di lapi
e Gobierno aki ainda.

E partido mas grandi di coalision, esta Pueblo
Soberano, cu lo mester bin cu claridad. PS tambe tin
un Parlamentario cu ta malo basta tempo y cu no ta
den Parlamento pa duna su voto. Posibilidad pa lapi
Gabinete Whiteman sigur por, riba papel, unda p.e. lo
tin cu traha cu partido PAR, Omayra Leeflang, kende
tambe ta independiente, y asina logra tog mayoria.
Pero segun conocedornan di politica na Corsou ta di
opinion cu mihor bin cu eleccion adelanta y no warda
te otro aña, p’asina tin claridad den mundo politico na
Corsou.

Kico a conduci Parlamentario pa partido PAIS, Marilyn
Moses, cu a kita su sosten di e partido y declara su mes
independiente, oficialmente no ta conoci.
Marilyn Moses, a manda un carta pa Presidente di
Parlamento unda e duna di conoce cu el a entrant awe,
(lesa ayera) e no ta forma parti mas di fraccion di partido
Pais den Parlamento di Corsou. Textualmente su carta
ta bisa: “Entrante awe mi ta un miembro independiente
den Parlamento di Corsou. Como tal mi ta retira mi
participacion den e coalicion den Parlamento di Corsou,
cu ta sostene Gabinete Whiteman. Entrante awe e
Gabinete aki no por conta cu mi sosten den Parlamento
di Corsou mas” e carta a finalisa bisando.