Page 7 - HOH

4 LOCAL
E advertencia silencioso:
Ora muchanan no ta sinti nan mes sigur cerca adultonan
UN mucha cu ta hala atras for di un brasa, cu
ta sconde tras di su mayor, of cu ta keda keto
cerca un cierto adulto por parce di no ta mucho
cos. Pa algun, e ta djis timidez. Pa otronan, e ta
wordo mira como un falta di respet cu mester
wordo coregi. Pero hopi biaha, e no ta ningun di
e dos cosnan ey. E ta e manera keto di un mucha
pa bisa: “Mi no ta sinti mi mes sigur.” Y si nos
ta poniendo atencion, nos mester scucha esey
AWEMainta Diamars, 14 October 2025
fuerte y cla.
Pa generacionnan largo, muchanan a wordo siña pa respeta adulto sin
cuestiona. Nan a wordo bisa pa brasa famia, sinta riba scochi, smile y
bisa bon dia, hasta ora nan no tabata kier. Bisa no tabata wordo mira
como un falta di educacion, of hasta desobediencia. Pero loke antes nos
tabata yama bon custumber por pusha muchanan den situacionnan cu
ta haci nan sinti nan mes profundamente incomodo—y pio ainda, siña
nan pa ignora nan instinto ora algo no ta sinti corecto.
Depredadornan hopi biaha ta confia precisamente riba e silencio aki. Nan
comportacion no semper ta obvio. E por cuminsa cu atencion excesivo,
mishimento fisico suave disfrasa como wega, of crusamento di limite
chikito—manera kishiki despues cu e mucha pidi pa stop, of comen-
tarionan cu e intencion pa haci e mucha sinti “special” of diferente for
di otronan. E actonan aki por parce inofensivo, pero pa un mucha, nan
por sinti invasivo of alarmante. E parti mas pio? Hopi biaha, muchanan
no ta wordo keri ora nan mustra incomodidad. Adultonan por insisti
cu e persona “djis ta cariñoso” of cu e mucha “ta haciendo drama.” E
rechaso aki ta manda un mensahe peligroso: Bo limitenan no ta impor-
tante, y bo instinto no ta conta.
Muchanan no semper por splica dicon nan ta sinti nan mes incomodo
cerca un persona. Kisas nan no tin e palabranan, of nan por tin miedo di
haya problema. Pues en bes di esey, nan ta uza nan lenguahe corporal—
nan ta hala atras, evita contacto visual, of ta cambia nan comportacion
diripiente despues di tabata cerca un cierto adulto. Esakinan no ta reac-
cionnan spontaneo. Nan ta instintonan protector, e unico hermentnan
cu un mucha por tin pa duna señal di angustia sin compronde comple-
tamente.
Loke ta haci esaki asina serio ta cu e resistencia silencioso di un mucha
hopi biaha ta su prome liña di defensa. Si esey wordo ignora, e por siña
pa stop di uz’e. Y esey ta precisamente loke esnan cu mal intencion ta
conta riba dje—muchanan cu a wordo siña pa no cuestiona adulto, pa
no bisa no, pa no papia ora algo no ta sinti bon.
Adultonan mester ta mas cu djis observadornan. Nos tin cu ta protector.
Esey ta nifica respeta un “no” di un mucha, hasta si e ta sinti incomodo
den e momento. E ta nifica reconoce cu forsa cariño no ta siña amor—e
ta siña sumision. Y e ta nifica confia cu hopi biaha muchanan sa cu algo
ta robes hopi prome cu nos.
Si un mucha mustra duda, ta evita un persona of situacion, of ta mustra
incomodidad repentino cerca un persona, nos no mester pura nunca pa
excus’e. En bes di esey, nos mester baha man, scucha, y tum’e na serio.
Pasobra tin biaha, e resistencia silencioso ey ta e unico advertencia cu
nos ta haya—y e por ta e unico chens cu nos tin pa interveni prome cu
daño wordo haci.