Page 10 - LOTTO JULY 15 2015

Minister Schwengle tratando di renegocia contracto cu
Canadian Bank tin cu Lotto

Publication: Wednesday, 15 July 2015. Categoria: General

ORANJESTAD (AAN): Minister encarga cu Asuntonan di Deporte, Alex Schwengle, despues di
lesa cantidad grandi di rapportnan cu el a haya riba Fundacion Lotto pa Deporte, e por bisa cu e
ta basta contento cu e maneho cu e fundacion ta hibando.

Tur cos ta draai rond di loke e Fundacion Lotto pa Deporte ta genera na placa pa principalmente
mucha y hobennan haya loke nan mester pa practica deporte y hiba un bida sano.

E ta haya cu deporte a avansa ultimo añanan na Aruba mirando e talentonan cu a bin ta
produciendo y esnan cu ta score internacionalmente. Ësey no ta cay di shelo, pero ta bini door cu
ta inverti bon den deporte. E por miho, pero e ta un proceso largo y cu disciplina, unda cu e
efecto den deporte lo bay ta mas miho.”

Pero tambe e ta haya cu su Ministerio sigur mester bay inverti mas den deporte y ya caba tin un
plan pa esaki. Ta papia specificamente di deporte na school, ya cu e ta sinti cu e parti aki ta un
tiki debil ainda. E tin nos debido atencion, pero mester tin e recursonan tambe pa por ehecuta e
plannan cu nos tin, e mandatario a indica. Ta trahando principalmente riba e plan pa financia
esaki.

Pa loke ta Fundacion Lotto pa Deporte, e ta haya cu e maneho ta hopi mas miho, mas
transparente, cu nan cuentanan anual cla na tempo. Esaki contrario na e maneho di antes unda cu
no por a duna cuenta di miyones di Florin. E ta haya lamentable si cu ora e grupo di Canada a
saca un man pa yuda rescata Lotto, el a bay costa di un prijs cu a bay pa Canadian Bank, cu ta
sacando su placa. Ta sintando na mesa cu e grupo di Canada pa trata di renegocia e contracto
vigente, ya cu e mandatario ta kere cu tin espacio suficiente pa ambos banda haya nan ganashi. E
mandatario kier logra cu ta aumenta e entrada di Lotto pa Deporte di Aruba.