Page 8 - MIN JUS

Locual cu Minister Sevinger a bin ta haci ultimo tempo ta dimas. No ta un, pero tin tres veredicto di
hues caba den cual ta poni preto riba blanco cu Minister Sevinger ta actuando contra ley y ta
trapando riba e estado di derecho di nos Pais. Esaki ta algo grave y ta muestra palpabel di mal
gobernacion na nos Pais. Pa e motibo aki tambe durante di e tratamento di presupuesto 2016 di nos
Pais, nos a hala atencion di Minister di Husticia Dowers, bisando e mandatario cu e no por keda
man crusa y laga Minister Sevinger haci deshaci na nos Pais.

Minister Dowers mester papia cu Ministerio Publico
E ta conoci cu ta Ministerio Publico ta e autoridad competente pa laga investiga y persigui esnan cu
ta actua contra e leynan di nos Pais y cu e Minister di Husticia no tin e autoridad pa bisa Ministerio
Publico ken pa investiga of persigui. Pero nos ta di opinion cu Minister Dowers no por keda cu man
crusa y laga minister Sevinger haci deshaci cu nos leynan. Minister Dowers mester haci sikiera e
esfuerso di papia cu Ministerio Publico y pidi nan pa den cuadro di bon gobernacion di nos Pais, pa
investiga y/of persigui e ministernan cu ta actua contra di nos leynan. Pasobra den e circumstancia
cu e mayoria den parlamento ta sostene e gobierno y pa e motibo ey ta deha di sanciona e
ministernan cu ta actua contra nos leynan, Pueblo mester por conta cu Ministerio Publico si lo
percura pa nos leynan wordo respeta.

Nos Pais no ta un republica di banana
E no por ta asina cu hues na tres ocasion caba ta dicta cu Minister Sevinger ta zaag na e pianan di
e stoel di nos estado di derecho, ta rasca na e raiz di nos estado di derecho y ta frustra e caminda
pa e cuidadano busca su derecho y nos Minister di Husticia ta keda man crusa y laga Minister
Sevinger haci deshaci. Nos Pais no ta un republica di banana na unda ta existi un free for all. Nos ta
biba den un estado di derecho na unda cu tin leynan cu ta proteha e interesnan di nos
cuidadanonan. Locual Minister Sevinger ta haciendo no por. E ta contra tur principio di bon
gobernacion y p’esey mester wordo condena p’asina no manda un señal robes na comunidad cu un
cuidadano of minister por actua contra ley sin mas. Como mandatario encarga cu husticia, Minister
Dowers ta e prome yama pa caba cu e abuso di Minister Sevinger. Minister Dowers no por keda
man crusa y laga Minister Sevinger haci deshaci na nos Pais.

http://masnoticia.com/segun-parlamentario-xiomara-maduro-minister-dowers-no-por-keda-man-crusa-
y-laga-minister-sevinger-haci-deshaci/