Page 3 - AHATA

PAGINA 6 DIARIO DIAHUEBS 15 FEBRUARI 2024
Aruba Tourism Authority cu
aprecio pa taxista Antony Lanoy

ORANJESTAD (AAN): Net riba Dia di San Valentino,
funcionarionan di Aruba Tourism Authority a dicidi na
transmiti amor y aprecio na e taxista Antony Lanoy, kende ta
core TX-176.
Nan a haci esey, debi cu consistentemente e ta demostra e
puresa hospitalario di Arubianonan. Y esaki ta algo cu ATA ta
ricibi feedback riba dje y ta aprecia hopi mes.
Pesey nan a ricibie cu e honor necesario y a dune algun
regalito pa su bon trabao, su perseverancia y iniciativa pa
yuda mantene Aruba su nomber na halto. Hopi danki mes,
señor Antony Lanoy.
Pastoor a bay aplica shinishi na alumnonan

Colegio San Antonio

ORANJESTAD (AAN): Riba Diaranson, e temporada di Cuaresma ta
cuminsa. Cuarenta dia pa reflexiona riba e bida cristian, e relacion cu
Creador.
E observacion di Cuaresma ta bay acompaña cu huntamento di shinishi
simbolizando un cruz na frenta di cada fiel. Specialmente pa esaki, Colegio
San Antonio MAVO na Santa Cruz a pidi Pastoor di Distrito Santa Cruz
pa presenta na nan Gym, pa asina duna predicashi cu e bon mensahe, y
aplica shinishi na alumno- y docentenan.
Cu e pensamento cu “shinishi bo ta, y como shinishi lo bo regresa”, e
alumnonan Catolico a para den rij pa asina haya e cruz for di Pastoor, cual
ta simbolisa e pordon di pica y fragilidad humano.
Dirigentenan di scol ta desea tur alumno y nan famia un periodo
bendiciona cu hopi paz y trankilidad. Cu nos creador por yena nos curason
cu amor, compasion y bondad pa nos por sigui traha duro riba nos futuro
y esun di nos isla.