Page 37 - AVP

Na un pais caminda awasero ta scars, Mike Eman a bay introduci un avenida di color di
su partido, cu ta berde pues “green”. 300 Miyon Aruba mester a paga pa un caretera
cu no tin caracter di Aruba, manera ta e caso di tur loke a pasa den man di gobierno
anterior.

Con Aruba ta bay mantene un caretera tur na mata berde, ta e pregunta grandi cu
pueblo no a haya oportunidad di puntra Mike Eman, cu tampoco a splica cuanto placa
Aruba lo mester a paga pa e caretera color di su partido di Playa bay pariba.

Cu mala fe no ta dura pa semper a wordo proba e siman aki ora na un forma
sumamente lamentabel Aruba mester a bay Balashi caminda hende a bira victima di un
structura dudoso cu tabata centro di propaganda politico di Mike.

Pa yega e siman aki, Aruba a wordo pusha den tension na momento cu medidanan
mester wordo tuma pa por sali for di e desastre financiero y economico cu gobierno di
Mike Eman a laga atras.

Ta den tension, Aruba a reuni na Balashi caminda un rapport cu DIARIO a uza pa splica
pueblo e wega di gabinete Eman, a rementa ora e vangrail di e brug no a soporta
impacto di un vehiculo.

Ta na e brug di Balashi e rapport “Bo Aruba” a haya contenido real. En busca di
informacion profundo tocante Green Corridor y e brug, a bay topa atrobe cu e berdad di
e contracto.

Green Corridor ta parti di e placa cu pueblo mester paga pa proyectonan PPS. Durante
18 aña Aruba mester paga 16.2 Miyon pa un brug, cu gobierno Mike Eman a laga traha
pa paga despues.

E cifranan oficial di Algemene Rekenkamer Aruba ta indica cu ta 300 Miyon pueblo lo
paga finalmente pa e proyecto di cual ainda e parti mas fastioso mester bini.

E avenida mester ta berde, color di partido AVP di Mike Eman, cu no ta splica cuanto
pos mester coba ni cuanto planta di awa mester construi pa por haya suficiente awa pa
e proyecto.