Page 13 - WEB

Ora cu nos analisa algun di e cobransanan cu nos a haya den box tira, pasobra pueblo a
cuminsa rabia, pueblo no ta acepta e tipo di cosnan aki mas, caminda e tipo di
documentonan aki ta yega, nan ta percura pa nan yega cerca nos tambe.

Pa coy un specificacion chikito di locual a wordo cobra honorario, tin uno cu e fecha di
10 di april 2018 caminda un cobransa a wordo manda pa Gobierno, relaciona cu
consehonan huridico cu a wordo duna durante di un reunion entre Richard Eman di RDA,
abogado Anthony Ruiz y abogado Hendrik Croes, relaciona cu preguntanan cu a wordo
haci.

Loke ta impresionante sin duda t’e hecho cu e dos abogadonan aki cu ta pertenece na
mesun bufete den cual Prome Minister ta accionista, t’e hecho cu tanto abogado Ruiz
como abogado Croes a manda cobransa di 2000 florin p’e reunion cortico aki.

Esaki ta ehempel chikito di e stapel di documentonan cu nos a haya y aki tin di haber cu
solamente RDA, pero tin di tur e otro companianan estatal tambe, manera di WEB y
Elmar.

Ta increibel con Prome Minister ta bisa cu e no sa di nada y den e documentonan ta
wordo señala cu nan tabatin ‘overleg’ cu Prome Minister Evelyn Wever Croes, caminda
hasta a manda un ‘whatsapp’ y a cobra 100 florin pa manda esaki pa Prome Minister.

Esaki ta ehempel con ta strika placa di pueblo, dor di manda whatsapp, a tope den gang y
a combersa un rato cune, e ta wordo cobra.

Pues practicamente tur rosea cu representantenan di e bufete aki hala, pueblo tin cu paga.

Nos por mira den e documento entre otro tambe un mail cu a wordo manda pa Gobierno
relaciona cu topico di conseho huridico, nan a cobra 175 florin.

Aruba tabatin un Gobierno cu tabata garantisa prosperidad p’e comunidad aki, tabata
garatisa proyectonan pa un desaroyo di e pais aki y awe e unico cos nos por mira ta
medida tras di medida y nos por mira pakico medidanan ta wordo tuma, pasobra e placa
tin cu bay na bufete di Papa.