Page 11 - MIN JUS

Posted on 07/24/2017 3:30 pm AST | Updated on 07/24/2017 3:32 pm AST

ORANJESTAD – E detencion di e sospechoso den caso Ibis, Giovanny Capriles a
keda prolonga cu 2 biaha 8 dia, esta 16 dia. Su abogado Chris Lejuez a confirma
esaki pa NoticiaCla. Ora cu e termino aki pasa, huez comisario tin cu dicidi si ta
bolbe prolonga e detencion of no. E otro dos personanan cu tambe ta sospechoso den
e caso aki, tambe ta deteni ainda. Pa loke ta Capriles, e ta na KIA for di comienzo,
pa motibo di su salud.

E CASO

Esaki ta bira e di dos biaha cu ta prolonga e detencion pa Capriles. Prome biaha tabata di
dos siman di juli (11) ora cu e detencion di e consehero y fotografo di e mandatario a
keda prolonga cu 8 dia. Pa loke ta e cargonan contra su cliente, Lejuez a splica cu e ta
mescos cu e otronan cu ta deteni, esta cu su cliente tambe ta wordo sospecha di soborno y
falsificacion den e caso Ibis.

DETENCION

Manera ta conoci caba, e Consehero a keda deteni dia 10 di juli den oranan di mainta,
riba sospecho di labamento di placa y complicidad na soborno. Vocero di ministerio
publico Ann Angela a confirma esaki pa e portal aki. Manera informa caba, e detencion
ta den cuadro di e investigacion penal contra e mandatario den e caso di fraude y
corupcion Ibis, y e prome cu ta directamente relaciona cu e oficina di e mandatario. Fuera
di consehero, e ta encarga cu parti di e PR di e mandatario, y tambe ta miembro di e
fundacion di e mandatario.