Page 14 - MIN JUS

ORANJESTAD (AAN) – Informacion cu DIARIO ta hayando practicamente tur dia, ta indica cu
hopi hende cu a paga pa permiso na hende of compania, a perde nan cen, pasobra nada ta
wordo resolvi.

Tin residentenan, por ehemplo Haitiano, cu na dado momento kier trece nan yiu
adolescente pa sigui studia na Aruba, y nan por tin nan cerca, cu a paga cantidad di placa
na un persona cu segun’e ta haci e trabao legal, pero tempo ta core y e persona no a haya
ningun permiso mientras hopi placa el a entrega.

E personanan aki ta kere cu mas di un hende mester bay cera na Aruba pa e tipo di
estafanan aki. Y e problema ta cu bay DIMAS directamente, ta un caminda di Cruz tambe.
Procesonan no ta cana, tin biaha e trato cu e solicitante ta haya no ta esun di mihor, y nan
ta mira den e hendenan cu tin un negoshi di permiso, un opcion.

No obstante no tur ta serio, no tur ta comprometi cu e cliente, pero si ta pidi balente placa
pa e tramitacionnan cu nunca ta wordo concreta. Asina aki, varios persona a duna di conoce
na nos redaccion.

Vooral di mamanan naci na Haiti, cu tin nan permisonan up to date, of tin firma liber, of
hasta ta naturaliza caba, cu kier trece nan yiunan pa nan studia na Aruba mes, ta keha di e
situacion aki. Y nan no ta hende cu ta ganando un dineral, ta personanan humilde, hopi
trahador y cu ta spaar aña aden aña afo, pa haya nan placa pa por tramita e permisonan
aki. Hopi yammer mes!