Page 4 - BNDIA ARUBA

A4 LOCAL
Dialuna 19 Februari 2018
Palabracion entre minister di enseñansa y sindicatonan tabata ‘curu’

ORANJESTAD - Despues di reuni cu minister di
enseñansa Rudy Lampe (RED), sindicato SEPPA cual a
reuni tambe cu SIMAR, ainda tin punto di preocupacion
riba e manera con a wordo anuncia cu lo haci di Dienst
Publieke Scholen (DPS) un fundacion, pero tambe e
status huridico di trahadonan. E combersacionnan aki
segun SEPPA a bay di manera hopi curu.

Despues cu minister di enseñansa a anuncia e plan pa haci di
DPS un servicio cu lo resorta bou di un fundacion cu lo yama
Stichting Openbare Onderwijs, rumornan a cuminsa circula cu
e mandatario lo ta separando DPS di gobierno pa asina corta
gasto di gobierno cu consecuencia cu docentenan lo perde nan
status como ambtenaar.

Sinembargo e mandatario a desmenti esaki y a subraya
anteriormente cu e iniciativa aki ta uno ‘noble’, pa asina limita
e influencia di minister di enseñansa den e asuntonan diario di
e fundacion.
“No tin nada di haber cu corta gasto ni cambia admision pa
studiante. Nada di esaki ta e intencion di e cambio aki. E unico
intencion ta pa limita e poder di e minister pa regla maneho
diario di scolnan publico. P’esey mi a bisa e intencion ta noble.
Pasobra ora un mandatario tuma stap pa limita su poder pa
bienestar di calidad di enseñansa e ora ey esey ta di aplaudi.”

Independisacion di enseñansa publico
E mandatario a splica tambe cu no ta trata di corta gasto, mirando cu lo percura pa gobierno sigui aporta fielmente na e fundacion aki. E idea ta pa haci e
fundacion aki un ehempel pa e otro fundacionnan riba maneho
profesional di enseñansa. Tumando nota di diferente critica riba
medionan social, nos a puntra minister anteriormente dicon no
a consulta cu sindicato di maestronan SIMAR pa loke ta trata e
cambio aki.

Sr. Lampe a splica cu esaki tabata un cambio cu nan a campaña
cu ne como partido RED pues esaki no tabata algo cu a bin
inesperadamente. “Mi no ta eherciendo un capricho di mi, mi
ta ehecutando loke e pueblo cu votado a pidi di mi.”

Normanan di bon gobernacion pa tur fundacion
Magali Brito, secretaria general di SEPPA ta conta Bon Dia a
splica un poco riba e manera cu e palabracionnan a bay entre e
2 partidonan sindical y gobierno.

Segun SEPPA, sr. Lampe a enfatisa cu lo bay enfoca riba cambia
leynan pa tur fundacion aplica principionan di bon gobernacion
y Good Corporate Governance. “Su speransa ta pa e fundacion
aki aplica e normanan aki pa despues otro fundacion tambe
cuminsa integra esaki den nan maneho.”

SEPPA ta remarca cu tur partido mester por ta di acuerdo cu
e asunto di hisa calidad di enseñansa y e principionan di bon
gobernacion, cual SEPPA ta mira si como un desaroyo positivo.

SEPPA ta para pa posicion huridico di trahado
E sindicato cual tin mayoria docente ambtenaar bou di nan, ta remarca cu aunke a tuma tempo pa tende pensamento di minister riba e asunto aki no
necesariamente kiermen cu nan ta di acuerdo cu loke a wordo palabra. Specialmente pa loke
ta trata e posicion huridico di docente, cual segun sra. Brito e minister ta considera como un
posicion di gelijkgesteld na un ambtenaar, SEPPA no ta di acuerdo. Ta p’esey segun sra. Brito
e minister ta haya ‘cu niun hende ta bay atras den nan derechonan’.

Sinembargo pa SEPPA ta importante pa remarca cu aunke cierto personanan lo dicidi pa
bay over na e sistema aki, tin hopi actualmente cu ta contra e cambio aki. Specificamente e
manera con e posicion huridico lo bay atras ta cu na contraste di un sirbido publico tal como
cual nan derecho no ta regla den LMA.

Pues den caso cu un empleado publico cu lo cay bou e fundacion no ta di acuerdo cu cualkier
cos cu nan dunado di trabou (pais Aruba), no por acerca e hues cu specificamente ta regla
asuntonan di ambtenaar den corte. “Un gelijkgestelde no por bay eynan, e tin cu cana otro
caminda, pues e ambtenaar mas bien tin mas garantia di trabou.”

Sra. Brito ta clausura bisando cu e minister mester compronde cu por tuma decision semper
y cuando ‘no ta mishi cu derecho di hende y cu pa cambionan asina mester busca apoyo di e
personanan cu ta cay bou e decision’.