Page 28 - Awemainta

28 AWEMainta Diaranson, 2 September 2015

Hobennan di SVT
tambe a duna man
na reconstruccion di
Parlamento

DIALUNA y diamars hobennan di SVT ta dunando un

man n’e trabounan di limpieza y drechamento di edificio di
Parlamento. E miembronan di e di 8 grupo di Formacion
Social tambe a duna oido n’e yamada haci dor di Prome
Minister Mike Eman y Presidente di Parlamento drs. Marisol
Lopez-Tromp. Hunto cu otro boluntarionan, a haci limpi den
parti paden y pafo di Parlamento, piki piedra, boter y otro
obhetonan cu a keda atras despues di e destruccion. Nan a
duna sosten n’esnan cu a re-emplasa e glasnan kibra for di
bentana y porta cu manifestantenan a kibra diahuebs ultimo.
Tambe e grupo di hobennan a haci trabounan di preparacion
pa verfmento di muraya, armando e stelagenan p’esaki.
E proyecto di Formacion Social semper ta cla pa contribui
na causanan social. Den pasado, SVT a yega di yuda den
organisacion di Fiesta Rotaria, como tambe durante campaña
di Aruba Doet. E obhetivo, segun Director di SVT, Jessy Ras,
ta p’e hobennan haya un nocion y experiencia di loke trabou
comunitario ta y con e ta beneficia pueblo, pero tambe nan
mes.
Den e caso specifico aki di Parlamento, a demostra cu violencia
no ta hiba na nada positivo y cu destruccion di propiedad
publico ta afecta e propio pueblo. Hobennan di Formacion
Social ta wordo educa den disciplina, respet, ofishi pa crea
di e hobennan aki ciudadanonan ehemplar.
Prome Minister Mike Eman ta gradici enormemente e
cooperacion duna dor di hobennan di SVT. E ta contento pa
mira con e programa aki ta aporta na cosnan positivo na nos
pais y ta dor di proyectonan asina aki Gobierno ta cambiando
e futuro di Aruba.