Page 4 - KPA

Total di 8 detencion durante parada di
mucha San Nicolas

Posted on 01/26/2016 7:44 am AST | Updated on 01/26/2016 8:30 am AST

ORANJESTAD - Polis a detene un total di 8 persona durante parada di mucha San
Nicolas. Ta for di trempan Cuerpo Policial Aruba a cuminsa cu preparacionnan relaciona
cu e parada di mucha den cayanan di San Nicolas. E parada a sali net 2:00 pm mientras cu
e prome grupo a yega final 5:45 pm, cu ta un ora aceptabel y segun a planea adelanta. Polis
ta raporta cu e muchanan participando a gosa masha mientras cu e cantidad di mirones
tabata menos.

CANTIDAD DI PARTICIPANTE

E parada di San Nicolas a conta cu 7 grupo cu mas di 700 participante. E gruponan tabata
Champagne Carnival Group (125) cu e tema "Barbie Rockers" compaña pa Tsunami, Little
Dreamers (100) cu e tema "Dream Car" tambe cu Tsunami, Little Groovers (75) cu e tema
"Under the sea", Nos Futuro (80) cu NBO, TOB (175) cu e tema "Super Heroes" compaña pa e
bandanan D'Vibe y N'Fuzion y Deja Kids (75) cu e banda 4Real. Claro cu separa di e gruponan
tabatin e carosa di apertura, brassband, e prins cu pancho hunto cu e reinanan, North Stars
Steelband y BMW cu a cera e parada cu un tremendo "Last Lap".

CANTIDAD DI POLIS

Na tur tabatin 115 Polis riba pia durante e parada, cu ta inclui Polisnan uniforma di
"straatdienst", polisnan di e unidad canino K-9, e ekipo "Mobiele Eenheid", e ekipo riba
bicicleta, e ekipo riba brommer, recherchenan na civil y sin lubida e personal administrativo cu a
atende cu multanan.

DETENCION

Aunke cu durante e parada tur cos a cana relativamente bon, despues di parada a nota varios
pelea pa cual a detene no menos di 8 persona. Un di nan a hasta haya cu un arma blanco straño,
un arma nobo, pero masha peligroso.

http://www.noticiacla.com/news/4919