Page 62 - MIN.JUS 4 NOV,2015

Caso di atraco di 46 mil Florin for di compania den Corte
Publication: Wednesday, 4 November 2015. Categoria: Judicial
Dos sospechoso ta deteni

ORANJESTAD (AAN): E hombernan G.M. y U.G., e siman aki lo mester presenta dilanti Hues
pa e caso penal cu Ministerio Publico a cuminsa contra nan.
Luna pasa, e caso a bin dilanti pro forma. Fiscal a splica den Corte cu e motibo cu e caso a bin
dilanti pro forma ta pasobra cu ainda e procesverbaal oficial no ta cla. Sin procesverbaal no por
trata e caso.
E acusacion cu Fiscal a presenta contra G.M. y U.G. ta cu hunto nan a haci e atraco riba un
compania. Normalmente ta asina cu ora un caso bin dilanti pro forma, Fiscal no ta duna hopi
detayes den e acusacion. Hopi biaha tur esaki ta sosode ora di tratamento di e caso, caminda
Fiscal ta bisa kico tur ta sospecha e sospechosonan di a haci.
VIDEO A GRABA TUR COS: Por a compronde cu tabatin video di seguridad cu a graba tur cos.
Abogado mr. Zara, cu a representa e sospechosonan, a pidi Fiscal pa e haya copia di e video pa
asina e por studia esaki bon promer cu tratamento di e caso.
E caso aki lo tuma lugar diabierna awor 6 di November y DIARIO lo cubri esaki y informa
lectornan kico tur a sosode den Corte.
Ultimamente por a ripara cu Ministerio Publico y Corte Comun di Husticia di Aruba, ta baha cu
man duro riba atracadornan.
Esaki despues cu Hof mes na un occasion a bati riba dede di Ministerio Publico y Corte di
Husticia di Aruba cu e castigonan ta mucho abao.
Hof no ta haci wega den casonan di atraco. E mayoria di acusadonan cu apela nan sentencia, ta
worde avisa pa pensa bon pasobra Hof, den mayoria di caso, ta subi e castigo.
E batimento riba dede aki, a pone cu Ministerio Publico a bira mas agresivo den su maneho riba
atraco y ta exigi hopi mas castigo pa e sospechoso(nan).