Page 42 - MIN SJA 1 MAART 2016

hecho cu awendia bo no por bisa un mucha nada, pasobra mesora ta papia di maltrato di mucha.
Otro hecho ta cu, mayornan mes ta purba di compensa e oranan cu nan no ta dedica na nan yiunan,
cu cosnan material. Hopi biaha ta lubida cu e mucha ta crece y ta crece cu cierto patronchi di bida.
Ora cu e mucha bira mas grandi, mas grandi e exigencianan ta bira tambe. Pa ora cu e mayor (nan)
kier pone un stop na esaki, pone un stop na e monster cu nan mes a crea, ya ta laat.
Ya no tin e sistema di antes, cu pa bo haya algo, bo mester por merece esaki, bo mester por a traha
p’e. Un ehempel, si antes bo tabata kier a haya un blusa of sapato di marca, como yiu, mayornan ta
bisabo cu bo mester bin cu un bon rapport. Of ta mandabo bay traha un vakantie job pa bo haya
cosnan cu bo kier. Asina tambe ta siña e mucha balora loke e tin.
Awendia ta asina, cu e mucha ta exigi cu e kier, e mester haya un keds di marca. Nan no ta worry si
e mayor por permiti su mes e luho di cumpra esey p’e. Nan no ta worry si tin mas ruman cu tambe lo
kier haya un sapato di marca. Tur esaki ta bin door di e falta di atencion di parti di e mayornan, cu
despues ta crece bira un monster.

FAMIANAN KIBRA
Otro motibo pa cual tin tanto criminalidad bou di nos hubentud ta pa e simpel hecho cu, hopi di e
muchanan aki, ta bin di famianan kibra. Nan no tin stabilidad familiar, kisas e mayor cu ken nan ta
biba, no ta pone mucho atencion na nan. Kisas un of ambos mayor a rehasi nan bida cu otro
persona, y e yiu aki ta sinti’e como sifuera e no ta pertenece na e famia en cuestion. Un otro motibo
pa cual tin asina tanto criminalnan hoben, ta e hecho cu aunke ambos mayor ta biba hunto, pero e
amor y cariño den un hogar no ta existi. Pleitamento, rabiamento, tur esey nan ta conduci na e
hecho cu e hoben ta busca atencion otro caminda, y e ta bira prooi pa criminalnan di mas
experiencia.

PEER PRESSURE
Algo cu ta hopi comun bou di e hubentud di awendia, ta e peer pressure. E presion pa ta “in”, sino
bo ta chapo. Y bo mester ta “in” pa bo pertenece. Kisas financieramente, e hoben no por pero e ta
busca tur manera pa pertenece. Nan ta bay over na hortamento, kisas paso esey ta “tough” y
cambia e material pa placa pa kisas, hiba un estilo di bida, cu eigenlijk nan no por afford. Mas facil
ta pa horta oro, y cambia esaki na un di e diferente casa de empeñonan cu tin ariba nos isla. No tin
mucho control ariba kico of ken ta cambia un joya. Cu e placa cu nan ta haya pa e joya, nan ta bay
bira cumpra loke, pa nan, ta importante. Un keds di marca, un jeans caro. Tur cos pa e aparencia. Y
hopi biaha e mayor (nan) ta asina bezig cu nan mesun cosnan, cu nan no ta ripara mes kico nan yiu
(nan) ta haciendo. Di otro banda, bo ta haya mayor (nan) cu no ta worry kico nan yiunan ta
haciendo, contal cu nan no wordo molestia. E negligencia ey ta pone cu e yiu ta busca e atencion
otro caminda. Y mayoria biaha e ta haya esaki ariba caya, cu tur e consecuencianan di esaki.