Page 14 - Min.Ecem 10 March'15

Minister Mike de Meza ta encurasha comunidad
pa sigui contribui na cuido di recursonan natural

· Mar 9th, 2015
· Local

“Aruba por ta un isla chikito, un isla entre asina hopi mas. Pero, ta hustamente nos isla, esun cu tanto
nos ta stima y ta protega, a sa di capta atencion di un team internacional di 18 experto den viahe cu ta
specialisa riba e tereno di sostenibilidad. Esaki ta “quite the accomplishment”, un logro grandi.” Esaki
Minister ing Mike de Meza a expresa cu satisfaccion y un sentimento di orguyo grandi ora cu el a haya e
grato noticia cu Aruba a wordo reconoci pa su “Destination Leadership” door di e instituto prestigioso
“National Geographic” durante di ITB Berlin.

Como e mandatario encarga cu maneho di medio ambiente, utilidad y energia, Minister de Meza y su
team tur dia ta bezig cu temanan relaciona na sostenibilidad, y proteccion y preservacion di medio
ambiente. Esaki ta parti di su compromiso cu Aruba como mandatario ya pa 6 aña caba como parti di
Gabinete Mike Eman I y II, unda cu a pone metanan firme pa yega na un Aruba 100% independiente di
uzo di recursonan procediente di crudo pa produccion di awa y coriente.
E termino “Aruba 2020” ta bon conoci awendia entre lidernan riba e tereno di energia sostenibel na hopi
pais, y mas ainda den Caribe y na paisnan y companianan multinacional cu un relacion estrecho cu
Carbon War Room, pa medio di e “Ten Islands Challenge”, entre otro.
E reconocimento cu Aruba a ricibi ta un “World Legacy Award”, un proyecto di National Geographic
Society cu a wordo lansa na aña 2014 pa reconoce e companianan, organisacionnan y destinacionnan
lider den turismo y viahe pa nan esfuersonan riba tereno di sostenibilidad.
E World Legacy Award a wordo otorga den solamente cinco categoria. Tabatin 150 inscripcion for di 56
pais y seis continente. E 18 experto riba tereno di viahe sostenibel a selecta e finalistanan den e cinco
diferente categorianan.
“Loke a sigui tabata un inspeccion rigoroso di cada nominacion, cu a wordo haci pa e expertonan na e
destinacion, compania of organisacion mes. Asina nan a scoge e ganadonan den cada categoria,” e
titular di medio ambiente a splica.
“Pa nos isla wordo scogi como e ganado, un destinacion lider, entre tanto otro nominado, particularmente
despues di un seleccion y inspeccion “on-site” estricto, mester yena nos cada un cu orguyo. Esaki ta un
confirmacion y ta re-afirma nos determinacion pa sigui padilanti cu nos esfuersonan y compromiso pa
sigui traha na reduci Aruba su “carbon footprint”, pa yega na un Aruba mas limpi, pa biba den miho
balansa cu nos medio ambiente,” Minister de Meza a subraya.
“Pabien Aruba! E reconocimento sigur ta sostene e sentimento profundo cu den e lucha contra cambio
climatico no tin esfuerso chikito y cada contribucion di cada pais, cada cas, negoshi y persona ta conta,
ni con chikito e teritorio en cuestion ta,” e mandatario a finalisa bisando.

http://masnoticia.com/minister-mike-de-meza-ta-encurasha-comunidad-pa-sigui-contribui-na-cuido-di-
recursonan-natural/