Page 32 - ARUBA BANK

Minister Bermudez: Nos a fortifica e supervision di Banco
Central, entre otro, riba fenomeno di ‘raspa tarjeta'

Sunday, 02 July 2017 20:11
1

Comparti

Siman pasa Parlamento a aproba unanimamente e ley cu ta fortificacion di e supervision di Banco
Central riba institutonan of companianan cu ta transferi placa pa exterior y cu ta cambia placa di valuta.
“Nos a amplia e definicionan den e ley pa asina Banco Central tin un miho supervision riba e
desaroyonan aki”, asina Minister di Finanza, Angel Bermudez a indica.
Segun e mandatario, e desaroyo cu ta tuma luga na Aruba unda cu turista of personanan no por haya
valuta of dollars den nan mesun pais y consecuentemente nan ta ‘swipe’ aki na Aruba pa nan por conta
cu placa of dollars cash, ta lo cual a duna inicio na e proposicion pa fortifica e supervision di Banco
Central.
“Esaki basicamente ta un actividad bancario pero nos a ripara cu no ta na institutonan bancario nan
tabata haci esaki si no na diferente negoshi den nos comercio”, asina Minister Bermudez a expresa.
Minister Bermudez a sigui splica cu esaki ta trata di un salida di dollars, pues Banco Central como
instituto encarga pa supervisa nos moneda y nos divisa mester tin e hermentnan necesario pa supervisa e
desaroyonan aki manera debe ser.
“Pa bo tin un registracion riba esaki, nos a bin cu e areglo aki cu ta duna nan mas posibilidad pa registra
y supervisa un desaroyo asina”, e mandatario a bisa. Na mes momento Minister Bermudez ta aclaria cu e
companianan cu ta realisa e actividadnan aki como parti di nan negoshi mester ta registra na Banco
Central y nan tin 6 luna pa haya e permiso indica pa realisa e actividadnan aki.