Page 100 - KPA

Prome Minister Eman: Nos a pone verkeersplateau na Kas
Paloma pa ofrece mas siguridad den trafico

Tuesday, 27 June 2017 21:09
Comparti

Sleeping police, cu awendia a bira verkeersplateau, ta algo cu ta existi pa hopi tempo caba na Aruba pero
den forma minimo.
Pero cu desaroyo di e isla, e fluho di trafico a bira mas grandi tambe cu tur su consecuencianan pa e
areanan habita. Esaki ta un preocupacion cu Prome Minister Mike Eman continuamente ta tende for di
su bishitanan den barionan di Aruba y a priminti cu e lo haci algo cu esaki. E promesa aki ta den
ehecucion. Ta construyendo verkeersplateau den areanan habita cu lo yuda baha e velocidad y duna e
habitantenan mas siguridad cu nan por cana trankil.
Na inicio di fin di siman dos di e verkeersplateaunan aki a wordo construi na Kas Paloma, den
Kolibristraat y Kinikinistraat, cu ta cayanan hopi trafico, entre otro vehiculonan di peso. Diasabra anochi
mientras cu e team di DOW ta trahando, nan a haya bishita di sorpresa di Prome Minister Mike Eman pa
gradici nan personalmente e sacrificio cu nan tur ta haci pa traha henter anochi pa mainta ora cu e
habitantenan lanta, e verkeersplateau ta cla y e trafico por mobilisa den su normalidad.

Pa e mandatario ta un satisfaccion grandi di por cumpli cu peticion di habitantenan. “Esaki ta un di e
temanan cu hopi bes nos ta scucha ora di bishita e barionan, ta algo cu ta birando hopi necesario pa trece
mas siguridad den e barionan. Mescos cu iluminacion, luz den bario, esaki ta un tema y deseo cu nos a
scucha den hopi bario y tambe cerca esnan di Simeon Antonio, specialmente Kolibristraat unda trafico ta
pasa cu hopi velocidad. Mi a bisa e habitante Frank de Palm cu nos ta warda pa e caminda nobo habri, cu
menos truck pisa ta pasa aki, nos ta pone e verkeersplateau. Awe nos ta cumpli cu e habitantenan di
Kolibristraat. Pa nan e ta siguridad pa e mucha- y adultonan,” Prome Minister Eman a expresa den
presencia di e habitantenan.

Empleadonan a traha henter anochi den Kolibristraat, y hasta tabata a haya koffie for di habitantenan y
otro a compaña nan henter anochi, como muestra di agradecimento pa e trabou cu nan ta haci. Prome
Minister Eman a splica cu Gabinete Mike Eman II ta sigui cu e programa di verkeersplateau den varios
bario mas, unda cu a keda constata cu e trafico ta hopi duro cerca di casnan. Ya caba a pone esaki den
bisindario di diferente scol rond Aruba.