Page 20 - ATA
P. 20
Directie Volksgezondheid (DVG), siguiendo noticianan internacional, ta tumando nota cu
e casonan di Malaria na Venezuela ta aumentando drasticamente y kier alerta nos
comunidad riba posibel importacion di Malaria pa Aruba.
Pa motibo di fluho di turista pa y for di Venezuela, e posibilidad ta considerabel cu un
caso di Malaria lo por keda importa aki na Aruba. DVG kier pa comunidad di Aruba sa
mas kico ta Malaria, kico ta e sintomanan y e recomendacionnan pa preveni e
enfermedad aki.
Malaria ta un enfermedad causa p’e parasito Plasmodium. E enfermedad aki ta wordo
transmiti door di un picadura di sangura di e especie Anopheles, infecta cu e parasito y
asina ta bay den e sistema di sanger.
Despues di 7 dia cu a wordo infecta cu e parasito, e sintomanan ta cuminsa presenta cu ta
Kippenvel; Keintura halto; Soda hopi y Dolor di cabes.
Directie Volksgezondheid kier conscientisa comunidad cu mester tuma medidanan di
prevencion si ta bay biaha pa areanan den cual tin un historia di transmision activo di
Malaria, den e caso aki p.e. Venezuela. E recomendacion ta pa evita pica di sangura door
di uza repelente of insecticida, pone net di cama y remedi specifico pa preveni Malaria.
Monitor di cerca personanan cu ta regresa di paisnan cu tin transmision activo di Malaria.
