Page 7 - FLIP HOH

Karel Maduro di MEP: Traha un hospital sin sala di operacion ta manera traha un
restaurant sin cushina

Thursday, 05 March 2015 15:42
Comparti

Pueblo di Aruba, cu hopi asombro, mi mester a tuma nota di un publicacion di Minister Schwengle
tocante e proyecto di hospital, den cual su persona na un manera contundente ta cuestionando Raad van
Toezicht y Raad van Bestuur di Hospital riba e eror di laga e renobacion y/of construccion di e salanan di
operacion for di e proyecto principal.

Esaki ta un ehempel claro cu e mandatario ta laga hopi di desea como minister, door di no ta na altura di
loke ta pasando rond di e proyecto di hospital. Dicon mester conclui asina? Uno, pasobra den Diario di
dia 17 december 2013, a sali publica cu ing. Juni Tromp kende ta miembro di Infrateam y di Comision
preparacion di proyecto HOH, a trece padilanti cu trahando riba e parti di renovacion y expansion, nan
(Juni Tromp y su gang) a bin topa cu e situacion cu mester a haci un cambio adicional mirando cu e sala
di operacion no tabata inclui den e proyecto, na fase 1A y 1B. Schwengle no tabata sa esaki? Tambe
Tromp a indica categoricamente cu e proyecto ta bay costa 100 miyon dollar (+/- 182.5 miyon florin) y cu
nan ta bay tover hinca e sala di operacion den e proyecto y toch laga e prijs mescos! Kiermen cu e proyecto
tabata costa mucho caro anto! Ta trata di salanan di operacion completamente nobo, incluyendo uno pa
catererizacion. Kende boso (Juni Tromp y su gang) kier tuma haci bobo? Por ta sr. Schwengle si!

Dos, dia 15 april 2014 Diario a publica e lista di e nombernan di esnan directamente envolvi y niun no a
remarca tocante e sala di operacion!? Straño pasobra ta na fase 1A y 1B ing. Tromp anteriormente a
remarca tocante falta di e sala di operacion. E comision encarga cu e trabao di construccion, cu no a
incorpora e sala di operacion ta Frendsel Giel (AIB), Jossy Figaroa (APA), Ruben Croes (HOH), Jassy
Simon (AIB/SOGA), Theo de Kool (HOH), Willem Broekaert (AIB) y Junior Tromp (InfraTeam).
Schwengle no tabata sa esaki? Tres, dia 23 april 2014, ingenieronan Junior Tromp y Jossy Figaroa a
publica den Diario cu nan ta para tras di e preparacion di e proyecto di hospital. Den e publicacion aki, sr
Tromp ta enfatisa nan satisfaccion pa cu e firmamento di contract cu ta duna inicio na e proceso di
ehecucion y cu aki cuater aña lo percura pa un hospital di nivel pa e pueblo di Aruba. Pa cuanto placa a
firma? Alaves sr. Tromp ta bisa cu e parti mas dificil ta tras di lomba, esta esun di scoge e arkitecto pa e
proyecto. Pues, e arkitecto NO a pinta e sala di operacion toch, nan a lag’e afo pa malo? Na 2013 caba sr.
Tromp a bisa cu nan ta bay tover/incorpor’e den e 100 miyon dollar, dicon e ta afo? Tambe cu ta sr. Benny
Sevinger mes a firma e contract y Figaroa ta splica cu e garantia pa pueblo di Aruba ta cu SOGA tin un bon
team di “sabionan”. Schwengle no tabata sa esaki? Awor dia 2 maart 2015, minister Schwengle ta bin
manera un hende cu ta pidi clemencia pa e grupo di “sabionan” cu ta encarga, bisando cu e urgencia cu
mester atende cu e asunto aki tambe ta pone cu no lo tin un destaho publico, pero lo otorga e trabao, cual
lo tin un costo di 10 miyon florin, pa medio di un “onderhandse bidding”. Tur partner ta na altura di esaki.
Kende ta haya e 10 miyon florin? Kico mas falta pa esaki ta MAL GOBERNACION, y di ta hole stinki na
corupcion? Bobedad of complice den e onderhandse bidding? Onderhandse ta mescos cu bow di mesa
toch, of no? Anto tur partner ta na altura pa colmo! Ta un set di corupto nan ta? Waw, ki dia Aruba ta
cuminsa compronde cu ta cu un grupo di wolf hambra pa placa y poder Aruba ta deal cu ne? Un hospital
sin sala di operacion enberdad ta mescos cu un restaurant sin cushina! DIOS spaar Aruba.