Page 21 - AM210608
P. 21
UN ARUBA HUSTO
Aruba ta para dilanti eleccion y ta importante pa reflexiona riba kico nos ta bay vota p’e. Nos ta
vota pa un parlamento cu como representante di pueblo su funcion ta pa controla gobierno, traha
ley y controla maneho di gobierno segun principionan di bon gobernacion, actuando y respetando
leynan vigente di nos pais, y salvaguardiando derechonan humano.
Riba 13 di november 2020 Minister President
den nomber di Gabinete Wever-Croes a firma
un acuerdo cu Hulanda p’e ehecucion di un
landspakket. Esaki a marca un rumbo nobo pa pais
Aruba cu ta un realidad cu no por wordo cambia.
E enfoke di e landspakket aki ta riba: maneho
financiero, costo y efectividad di sector publico,
impuesto, sector financiero, economia, cuido,
enseñansa y fortificacion di nos estado di derecho.
E palabracionnan concreto haci entre Aruba y
Hulanda ta poni den un agenda di ehecucion cu ya
a inicia.
Ta pa e motibo aki, Partido MAS kier trece un
programa di partido REALISTICO y REALISABEL,
teniendo cuenta cu varios di e puntonan menciona
den e landspakket aki. Es mas, e programa di
metanan mundial pa desaroyo sostenibel (SDGs),
cu ta basa ariba principionan di transparencia,
responsabilidad, impacto di maneho y derechonan
humano, lo forma un compas esencial den e
programa aki pa un maneho duradero pa Aruba.
Sin lubida, e pandemia di COVID-19 a brinda nos
e oportunidad pa haci cosnan diferente . Si nos
tur uni cabes nos por yega na sali padilanti y
hunto crea un Aruba husto, LIBER DI CORUPCION
brindando BIENESTAR na cada persona bibando
na Aruba, unda tur hende ta haya oportunidad
di disfruta di un mihor calidad di bida y na unda
RESPET mester wordo estableci den nos comunidad
y den Reino.
drs. Marisol J. Lopez-Tromp
Lider di partido MAS
