Page 30 - MIN SOC, 29 MAY

Comparti

Pader Daniel den un entrevista tocante un wega cu tin caracteristicanan di un sesion di invocacion di
sernan indesea, a adverti comunidad pa ta alerta y particularmente pa mayornan y maestronan tira extra
bista y ta atento cu muchanan y hobennan.

El a pidi pa adultonan papia cu e hobennan y subraya e peliger di hunga weganan cu ta yama nombernan
di hende of sernan desconoci pasobra loke nan posiblemente por ta yamando den nan circulo no ta nada
bon.

El a pidi pa tur hende ta un poco mas atento y preocupa, pero no cay den panico tampoco, pero si pa
observa mayornan observa nan yiunan y maestronan observa alumnonan y splica nan na un manera
comprendibel cu nan no por yama hende of forsanan den algun nomber cu no ta conoci y no sa kico ta
sconde den dje.

Porta e wega aki ta simplemente un forma di diberticion, pero e testimonionan di personanan cu a hung’e
y ta pidi pa otronan no mishi cune ta bastante pa realisa cu ta miho keda leu.

Bo no sa kende ta tras di e nomber y na kende e ta pertenece, realmente invocando bo ta yam’e, esaki ta
un acto di boluntad cu ta habri porta di bo bida, bo alma y curazon pa e persona of ser pa e bira presente
den bo, Pader Daniel a splica. Bo ta duna e yabi di bo bida, bo ta confia bo tesornan interior, intelectual y
afectivo na un ser cu bo no conoce.

Conocemento spiritual y biblico ta bisa e mundo spiritual ta existi, Pader Daniel a bisa. “Apostel Pablo ta
adverti nos, e ta bisa “boso lucha no ta contra carni y weso, boso lucha ta contra podernan di e mundo
spiritual,” el a splica.

Pader Daniel a describi e forsanan aki manera bijbel ta describi nan como forsanan cu ta astuto manera
serpiente, nan ta inteligente y ta busca yabi di hende su curazon. Curiosidad di un wega por ta un di e
engañonan di forsanan scur pa por drenta bida di e hoben y e mucha y San Pedro ta bisa den su carta pa
paga tino y vigila pasobra diabel ta cana rond keto manera leon pa wak ki momento e por deborabo, Pader
Daniel a subraya.

E clero a bisa cu tin den e Santa Escritura, e Palabra di Dios, advertencianan hopi serio, pasobra demonio
ta inteligente y ta cana rond y su trampanan ta atractivo.

El a pidi pa adultonan ta atento pa cambionan den nan yiunan, si nan ta nota algun perturbacion afectivo
of mental of sentimental y pa nan papia cu nan yiunan. No hunga weganan cu nan no ta compronde,
pasobra e por ta djis un wega, pero e por ta invocacion tambe di spiritonan malo cu ta probecha di e
invitacion.

Comentarionan (1)
Mustra/Kita comentarionan