Page 8 - AM200811

8 AWEMainta Diamars, 11 Augustus 2020

Kiwanis Circle K of Colegio EPI cu

su proyecto di “Back to School”

Kiwanis Circle K of Colegio EPI a realisa den fin di siman nan proyecto
“back to school 2020”, unda a haci entrega di 44 tas na studiantenan di
kleuter te cu scol basico. E idea a bin di nan miembronan pa por haci un
proyecto unda nan ta paketa tas cu tur articulo necesario cu un hoben tin
mester pa cuminsa e aña escolar cu bon pia. Durante vacacion escolar e
miembronan a dedica tempo pa por planifica y despues ehecuta e proyecto.

Kiwanis Circle K of Colegio EPI durante aña ta ehecuta diferente proyecto
pa comunidad di Aruba. Proyecto manera; “Christmas Lights’” unda e
miembronan di Circle K of Colegio EPI bou guia y supervision di mentor
ta hiba e muchanan di Casa Cuna bishita e casnan di luz mas conoci. E
proyecto aki ta tuma lugar pa 3 aña caba den luna di december.
Aunke den e tempo dificil e companianan a sa di duna man pe bon causa.
Kiwanis Circle K of EPI ta un “Sponsor Leadership Program” cu ta wordo
patrocina y ta bou guia di Kiwanis Club of Aruba. E meta di e club ta
promove, siña y stimula hobennan di un edad hoben e importancia di
duna bek na nos comunidad.

Por ultimo Kiwanis Circle K of Colegio EPI ta desea tur studiante un bon
aña escolar 2020-2021. Pa mas informacion tocante Kiwanis Circle K of
EPI, por bishita nos plataformanan social Facebook: Circle K of Colegio EPI
of Instagram: @ckiepi