Page 30 - DESPA 29 MAART 2016

DESPA: Hende muhenan na estado mester ta mas alerta pa
Zika

Thursday, 24 March 2016 21:40
Comparti

Departamento di Salud Publico recientemente a emiti un alerta nobo pa dokternan di cas riba nos isla,
relaciona cu cifranan actualisa di e enfermedad Zika. Te cu dia 14 di maart ultimo, Departamento di
Salud Publico ta raporta un total di 17 caso confirma di Zika di cual 11 ta transmicion local.

E comite di International Health Regulations IHR, a hisa e "surveillance" pa cu Zika y a adapta e
consehonan emiti anteriormente. Den esaki a actualisa e conseho pa biahe pa señoranan na estado, den
cual ta conseha nan pa NO biaha pa paisnan unda tin casonan di Zika. Tambe ta conseha damanan na
estado pa evita pa wordo pica dor di sangura, pues pa tuma e precaucionnan necesario. A subi e
medidanan debi cu e indicacionnan pa cu e enfermedad di microcefalie pa babynan ta mas evidente, pues
mester evita mas cu por pa e futuro mamanan haya pica di sangura Aedes aegypti.

Di otro banda e pareha di damanan na estado cu biaha pa paisnan unda tin casonan di Zika mester sigura
practicanan sexual den forma sigur. Expertonan medico ta hasta conseha pa practica abstencion.

Ta bon pa menciona cu e indice di vector Aedes aegypti na Aruba ta keda abou, por lo menos bou di e
standard impone pa PAHO. Esaki debi na menos criadero, cual factor ta beneficioso pa e resultado den
menos actividad di Zika riba nos isla. Asina mes GKMB ta teniendo un accion di "Swipe"pa henter Aruba,
den un esfuerso pa fumiga y elimina e sanguranan. Ya a spuit na Oranjestad y Noord caba.

DESPA a habri un "hotline" pa contesta cualkier yamada tocante Zika na number 5975000 durante 24
ora pa dia.

E protocol pa maneho di Zika den caso di damanan na estado ta den ehecucion, aunke constantemente
bou revision debi na cu circunstancianan ta sigui cambia. E sintomanan di e enfermedad ta hopi leve, ta e
dokternan mester check bon. E testnan cu tin disponibel awor ta dura entre 5 pa 7 dia pa duna un
resultado. Ta importante realisa cu e sintomanan ta asina leve, cu casi no ta not'e. Corda cu. Di cada 10
pashent infecta cu Zika, ta solamente 2 di nan ta sinti e sintomanan, pues ta bira malo. Pues un persona
cu tin sintomanan manera conhuntivitis(wowotis), rash, keintura,sigur lo pone dokternan alerto pa por
distingui si ta un "rash" of si ta Zika.

E mensahe prinicpal ta keda sinembargo pa elimina tur criadero of posibel criadero. Sin criadero no tin
sangura y si no tin sangura no tin Zika, Dengue ni Chikungunya!

http://www.24ora.com/local-mainmenu-5/106817-despa-hende-muhenan-na-estado-mester-ta-mas-
alerta-pa-zika