Page 25 - ATA - APRIL 30 , 2015

Aruba Tourism Authority a entrega rapport anual 2014

Publication: Wednesday, 29 April 2015. Categoria: General

Cu cifranan y resultadonan fuerte y concreto

ORANJESTAD (AAN):: Diamars mainta a habri cu entregamento oficial di e di cuater edicion
di e rapport anual di Aruba Tourism Authority. Ta trata di un documento di 125 pagina entrega
na Minister Otmar Oduber di Turismo y pa despues na su turno entrega na Parlamento cu lo tin
10 dia pa repasa e rapport.

E rapport aki ta consisti (segun ley) di un relato general di tur actividadnan di A.T.A. for di
mercadeo pa recurso humano, di un relato di actividadnan di Junta di Supervision pa cu aña
2014, y un relato financiero cu ta basa riba un auditoria completo, financiero di A.T.A., cual ta
worde haci door di un accountant independiente cu den e caso aki tabata e compania Ernst &
Young, kende a firma e relato financiero y comproba cu A.T.A. ta cumpli cu tur locual tin skirbi
den e rapport y alavez den e ley aplicabel pa Aruba Tourism Authority Sui Generis, cu na final di
aña 2014 tabata un aparato consistiendo di 64 empleado, segun e rapport anual.

For di e relato por saca afo cu na 2014 a sobrepasa e obhetivo nacional di 2.5% di crecemento
den bishitantenan pa nos isla, door di logra un nivel di crecemento di 9.5% cu ta traduci den mas
cu 1.07 miyon bishitante durante aña 2014. Pa loke ta regarda e cifranan di “Tourism Receipt”, a
nota un aumento di 7.2% te cu e di tres trimester di 2014, mientras cu a stipula un meta di 4% di
aumento. REVPAR a conoce un aumento di 20.6% mientras cu a pone como obhetivo 9%.
Yegada di crucero a disminui cu 3%. E obhetivo tabata pa consolida e cifranan di 2013.
Practicamente riba tur frontera a supera e obhetivonan nacional pa turismo den 2014.

Na nivel mundial turismo a crece for di un 4.7% den 2014, competiendo asina den termino di
volumen di negoshi na cifranan igual of mayor cu exportacion di petroleo, alimento of industria
di auto. Na aña 2013 segun cifranan di WTTC (World Travel & Tourism Council), turismo a
representa 84,1% di GDP di Aruba. Ta conta cu e cifranan aki a aumenta cu 6.4% den 2014,
segun WTTC.

Pa loke ta trata e parti financiero na 2014, A.T.A. a genera mas entrada di locual a presupuesta.
Mientras cu un enfoce mas amplio riba eficiencia y efectividad a conduci na gastonan reduci riba
area di mercadeo como tambe di OPEX (Operatonal Expenses / Gastonan Operacional). E
combinacion di esaki a resulta den un resultado netto positivo pa cu aña 2014. Completando e
fondo di emergencia mandatario den 2014, cu ta suma un total di AWG 18.7 miyon, ta ainda
resulta den un “surplus” pa cu aña 2014.