Page 74 - AHATA

E situacion financiero di Aruba bou supervision no a drecha y a bira pio bou un
redoblacion di nos debe nacional. Na momento di cambio den gobernacion a bin resulta
cu e proyecto di refineria cu mester a produci entrada pa Pais Aruba, no a concretisa
creando asina un deficit mas grandi y cune e hecho di no lo por cumpli cu e norma di
deficit pa aña 2018 manera fiha den articulo 14 di e Ley di LAFT.

Pa evita e menasa di un Decreto di Rey (KB) pa incumplimento cu e Ley di LAFT pa
aña 2018, Gobierno mester a drenta den negociacion cu Hulanda pa por stipula otro
norma y otro caminda con pa yega na un finanza publico manehabel. Esaki a resulta den
e Protocol di november 2018 cu ta cubri presupuesto 2019 te cu 2021.

MENASA KB
For di e cuentanan anual di Pais Aruba pa 2018 ta resulta cu Gobierno a cumpli cu e
norma di deficit pa 2018 y a keda den margen di e apoderacion cu Parlamento a duna
Gobierno pa por haci gasto.

Pa 2019 te cu e di dos kwartaal, Gobierno ta cumpliendo cu e apoderacion di Parlamento.
Riba e hecho aki CAFT a raporta positivamente. Pero locual CAFT ta keda cuestiona y ta
pidi cambio di presupuesto pe t’e fondo di Crisis Social (SCP).

Segun e Colegio di supervision e fondo di SCP mester ta incorpora den Presupuesto
2019 p’asina e gastonan relata na personal cu ta wordo tuma pa ehecucion di e SCP,
conta tambe den e maximo di 479 miyon.

Segun CAFT su interpretacion di e Protocol di november 2018, e SCP ta forma parti di
Presupuesto di Pais Aruba.

Segun Gobierno, e SCP ta un fondo cu a wordo lanta apart cu su propio presupuesto
manera otro fondonan di inversion cu Aruba a yega di conoce y no ta forma parti integral
di e Presupuesto di Pais Aruba pa 2019.

Banda di esaki e fondo di SCP no tabata topico tampoco di e negociacion pa yega n’e
Protocol di 2018.