Page 18 - MIN VOS 9 MAART 2016

Abogado a confronta hues riba

desicion di minister

Posted on 03/8/2016 5:47 pm AST | Updated on 03/8/2016 6:44 pm AST

ORANJESTAD - Gobierno a uza e caso den corte dialuna contra Sizzu Properties NV (doño di Ocean Z hotel), pa
confronta hues riba e keho di hues contra gobierno su actuacion supuesto iresponsabel recientemente. “Nos a haya cu e
keho ey (huez ta considera actuacion di gobierno den caso(nan) di cambio di destino di tereno, como ‘cortamento di e pia
di nos derecho di estado’ (na hulandes “regering zit te knagen aan de wortels van de rechtstaat en de rechtsgang te
frustreren”) no tabata na su lugar”. Abogado di gobierno Johan Sjiem Fat pa prome biaha desde e sentencia, a reacciona
publicamente riba e declaracion ey dilanti hues dialuna durante e caso cu Sizzu Properties NV (Ocean Z hotel) a entama
contra gobierno. Y NoticiaCla.com despues a papia cu e abogado riba e tema. “E desicion unda cu e keho a wordo lansa,
tabata un caso diferente (Porco Gallina di Salinja Serca). Den e caso ey no tabatin ningun necesidad pa Corte bin cu e
acusacion ey” Sjiem Fat ta sigura NoticiaCla.com.

GOBIERNO A BAY DI ACUERDO CU CORTE

Segun e abogado, e ta bisa esey pasobra ‘Gobierno den e caso ey a bay di acuerdo cu e ‘orde maatregel ey cu a wordo pidi’.
“Pero fuera di esey, no tabatin ningun intencion di cumpli cu e desicion di corte” e abogado ta sigui bisa. “Simplemente a wordo
pidi den e prome kort geding na december un orde maatregel cu no tin mag di cambia e bestemming, y huez no a bay di acuerdo
cu e peticion ey. E no a duna e orde maatregel ey” e abogado ta sigui bisa. E unico cos cu hues a bisa e dia ey, segun Sjiem Fat,
cu bo no mag di habri e hotel si bo no tin tur e permisonan. “Kiermen den opinion di minister di infrastructura e tempo ey, e
unico cos cu tabata falta ta cambia e bestemming pa por haya e permiso necesario. Es decir e bouwvergunning y hotel
vergunning”. Segun Sjiem Fat, a haci esey no sabiendo cu dos siman despues lo a bin un desicion cu corte a prohibi di cambia e
bestemming. “No tabata e intencion di minister, di ningun manera di frustra esey!” e abogado ta sigura.

GOBIERNO TA RESPETA DESICION DI CORTE

Mirando e desicion di minister di salud Alex Schwengle cu a bisa cu e ta bay warda e decicion di corte prome cu e duna un
permiso di hotel, ta indica cu gobierno tin tur intencion di respeta e desicion di corte”, Sjiem Fat a bisa.