Page 43 - AVP

Robert Candelaria Kier Sa Unda E Plan Di Minister

Andin Bikker Pa Combati Crimen A Keda

 Politica
- 21/01/2020

Parlamentario Robert Candelaria a declara recientemente durante un entrevista e
preocupacion continuo riba e tema di criminalidad riba nos isla. Trabou di Parlamentario
den oposicion sigur di importancia pa trece contribucion positivo constructivo, pero
tambe critico riba Gobierno di pais Aruba

Cifranan ta alarmante mas aun si mira y compara esnan di atraco cu ta tumando lugar.

Minister di Husticia actual, mr. Andin Bikker den su añanan di opocicion tabata pidi
constantemente reunion publico, mocionnan di desconfiansa, apelando p’e Minister e
tempo ey bay su cas, pasobra e no ta sinti cu e por a eherce e encargo. Cu cada atraco e
tabata highlight y mustra dicon e no tabata apto. Ta algo cu pueblo den tu totalidad ta
corda fresco den mente.

For di campaña te cu awe den Parlamento, e tema di atraco tabata su punch bag.
Sinembargo e realidad ta cu un atraco no ta dependiente ken ta den Gobierno ni ken ta
Minister. Un atracador no ta bay cuestiona si ta Andin Bikker of no ta den e cargo of si ta
pensa dos biaha pa evita un atraco pasobra nan por keda gara. Absolutamente no ta
alcaso, no ta import’e y lo continua cu su plan di atraco cueste loke cueste.

Ironia si di parti Minister Andin Bikker ta cu el a proclama di tin un plan concreto y
pragmatico den man. Tabata locual el a vocifera pa ocho aña sinta den stoel como
Parlamentario, durante campaña y hopi mas prome den su partido anterior. Den su boca
semper: “Dowers no ta sirbi, e si ta bin fix tur cos”.

ATRACO TA KEDA ALARMANTE!