Page 7 - MIN JUS DEC 30,2015

Nos no ta biba na otro pais, segun Bikker. Nos ta biba na Aruba y na Aruba, di e 40 pico aña cu
tin biba aki nan, no por corda cu tabata tin asina hopi criminalidad. Ta haya esaki inaceptabel y
ta kere cu fraccion cu ta sosten’e, mester dun’e un señal cu asina aki no por sigui. Ta hopi
lamentabel cu e minister aki no ta realisa cu e ta políticamente responsabel y cu pueblo no por
soporta mas criminalidad di e nivel aki. Ta recorde tambe cu na 2012, ora cu a presenta
presupuesto alternativo, a bin cu un amienda caminda cu a reserva 75 mil florin cu a pone
disponibel pa entre otro ehecuta e proyecto di Crime Alert, yama na Hulandes, Burgernet, via un
sistema di mensahe, por laga pueblo yuda pa soluciona casonan di criminalidad. E minister aki a
haya e propuesta aki den un amienda. El a wordo trata, a bin cu otro amienda tambe, pa loke ta
trata promocion, informacion di pueblo pa loke ta e ley cu a bin cun’e di defensa propio. Tambe
e minister a haya sumanan via di e presupuesto y a bin resulta despues, cu e no a haci nada cu
esaki.
Ora cu biaha pa islanan den Caribe ta haya informacion hasta na aeropuerto caba riba ley di
defensa propio. E minister a haya sumanan cu por a atende cu esaki, pa informa pueblo
debidamente con e ley aki ta funciona, e no a haci nada cun’e. Di parti di PDR, loke cu Bikker
kier ilustra ta cu apenas 1 asiento, a haci nan maximo esfuerso pa duna proteccion na pueblo cu
instrumentonan constitucional cu ta dispone di dje.
Lamentablemente e minister aki no ta haciendo nada. Den su caso, e ta ignora y ta keda busca
escusa, wak indice. E ta wak kico ta pasando na otro pais, pero na Aruba mes no ta haci nada.
Nos no ta bibando ni na Irak, ni na otro pais, caminda cu criminalidad ta brotando. PDR ta bisa
cu ta inaceptabel cu pueblo mester sigui sufri na man di criminalnan y cu e minister cu ta
politicamente responsabel no ta haci nada pa esaki. Ta bayendo pa 6 aña cu den concepto di PDR
no tin e capacidad.
A puntra Bikker si cambia e minister y pone otro hende esaki lo cambia algo cu e crimen lo baha
y polis no ta haciendo su trabou bon of falta algo pa polis bira miho.
E sistema parlamentario cu ta funciona den dje ta caminda cu un persona a políticamente
responsabel. Ora cu despues di tanto aña ta bin resulta cu e no tin un plan di maneho efectivo, e
ora mester cambi’e. Siguramente segun Bikker, cu si cambia e minister di husticia, ta duna otro
oportunidad pa ehecuta e trabao cu esaki obviamente no por.
Tambe, cuerpo policial ta haciendo un tremendo trabao, pero si nan no tin un plan of si e minister
di husticia no tin un plan pa ehecuta, e ora cada biaha e cuerpo policial ta hay’e cu e ta
funcionando y ta atendiendo cu cosnan cu ta pasa diariamente.
Mester soluciona e problemanan di criminalidad na un manera structura. Esey e minister ta esun
cu ta responsabel políticamente pa e maneho obviamente su maneho no ta efectivo, segun e
parlamentario.

http://masnoticia.com/andin-bikker-un-minister-di-husticia-mester-tin-caracter-si-no-tuma-bo-retiro/