Page 80 - KPA

Danki pa e pasenshi y pronto lo cuminsa entrega un gran
parti di e proyecto di Green Corridor

Monday, 05 June 2017 20:00
Comparti

Durante un conferencia di prensa riba Ser’I Teisji Prome Minister Mike Eman y Minister di Infrastructura Benny
Sevinger a papia di un proyecto cu a wordo agrega den e plan total di ‘Green Corridor’: Un caminda di 10 km largo pa
ciudadanonan por cana of practica ciclismo.

Na e ocasion aki tambe tabata presente Carlos Zubieta, representante di ODINSA, y a splica di e parti nobo di
construccion y entrega di e proyecto ‘Green Corridor’.
Zubieta a splica cu Gobierno kier promociona e uzo di ciclismo, y movecion en general, na Aruba, e ta e
motibo tambe cu construccion di un caminda pa bicicleta a wordo inclui den e proyecto total. E proyecto
ta encera un construccion cu ta brinda siguridad na e ciclista. ODINSA ta haci un donacion di 1000
bicicleta y ta un forma pa promove movecion. Pero tambe un manera di transporte, cu por tin
contribucion positivo na proteccion di medio ambiente.
Pa loke ta ‘Green Corridor’, Zubieta a bisa cu nan den e fase final di entrega di e trabounan. “Nos ta
masha agradecido na e habitantenan cu a mustra comprension pa e tardansanan chikito den e trafico,
pero mi por bisa cu ya nos ta den e recta final.” Den e proximo lunanan lo cuminsa cu entrega di e
trabounan, cuminsando cu e rotondenan cu ta den uzo caba y e otro partinan cu ta cla caba. Esakinan lo
ta na final di augustus y cuminsamento di september.
Ing Marlon Croes, director di DOW, a bisa cu berdad nan a wordo informa cu diferente trabou ta bay
wordo entrega. Sinembargo te ainda ta bay tin algun desviacion di trafico, pa cual ta pidi
automobilistanan un poco mas di pasenshi pa e trabounan cu falta ainda. Awor tin e caminda pariba di
rotonde di Pos Chiquito cera, te diaranson, pa haci trabou di mantencion di e brug peatonal.
‘Green Corridor’ ta un proyecto cu ta cuminsa for di aeropuerto yegando te Pos Chiquito cu dobbel via, y
despues tur e rutanan cu ta sigui pa San Nicolas a wordo renoba y embeyece. Ta papia aki di 36 KM di
caminda nobo, asfalta.