Page 5 - MIN JUS 9 MAART 2016

Minister Arthur Dowers: Resultadonan positivo ta prueba cu
departamentonan di husticia ta funcionando optimal

Tuesday, 08 March 2016 17:30
Comparti

Lamentablemente Aruba ta creca di teritorianan, particularmente Colombia y Venezuela, unda cu hopi
droga ta wordo trafica, pues tur e departamentonan cu tin di haci cu husticia mester ta continuamente
alerto.
Minister di Husticia Arthur Dowers a comenta esaki durante di un conferencia di prensa dialuna mainta,
agregando cu e resultadonan cu ta logrando cada bez ta mustra cu e departamentonan ta funcionando
optimalmente.
Un di resultadonan cu e mandatario tabata referiendo na dje ta e hayazgo di droga den awanan teritorial
di Aruba, cu a resulta den varios detencion y un cantidad grandi di droga confisca pa autoridadnan. El a
felicita Kustwacht, Ministerio Publico, Cuerpo Policial y Aduana cu e trabao haci pa kita e cargamento di
droga aki for di circulacion den fin di siman pasa.
"Mi ta sumamente contento cu e resultado aki," Minister Dowers a bisa. Resultadonan bon ta bin ora cu
pone facilidadnan y materialnan disponibel y tur esunnan envolvi ta pone cabeznan y esfuersonan hunto
pa yega na resultadonan sumamente alentador, segun e titular di husticia.
Minister Dowers a bisa enfaticamente cu a palabra entre e departamentonan y instancianan encarga cu
investigacionnan asina grandi, cu lo duna informacion preliminario so y lo duna informacion hopi
"global", pues a acorda cu no lo menciona detayenan di e caso pa no stroba e investigacion. El a haci un
apelacion tambe na tur persona envolvi, como tambe prensa pa ta atento pa cu speculacionnan, y cu ora
cu conclui e investigacion lo duna mas informacion y detayenan di e caso.
E mandatario a bisa tambe cu e no lo comenta riba cuanto droga a wordo haya, y informacion asina no ta
cosnan cu ta conoci na momento cu tuma e cargamento den beslag, pero ora cu e wordo pisa.
El a conclui bisando cu Ministerio Publico lo duna mas informacion ora cu esaki ta disponibel.

http://www.24ora.com/local-mainmenu-5/106144-minister-arthur-dowers-resultadonan-positivo-ta-
prueba-cu-departamentonan-di-husticia-ta-funcionando-optimal