Page 25 - awemainta7nov2015

AWEMainta Diasabra, 07 November 2015 25

Prome Minister a bishita cas, scol, kapel
y veld den Accion di Bario na Madiki

UN ACCION di Bario masha completo y activo t’esun cu Prome Minister

Mike Eman y e departamento di Bo Bario tabatin diahuebs mainta.
E recorido den bario di Madiki a inclui bishita na Anglo Kleuterschool,
habitantenan, Kapel di Madiki y facilidad di club deportivo Riverplate.
E mandatario a keda masha satisfecho cu tur locual por a haci inmediatamente
den e bario, pero tambe tuma nota di loke mester pa atende.
E intercambio cu habitantenan semper ta dun’e un bista mas cla di con
Gobierno por ta util p’e pais.
Premier Mike Eman a haya, manera ta custumber, un bon bini masha caluroso
tur caminda cu el a pasa. For di e muchanan n’e kleuterschool cu a canta,
saluda y combersa cu Minister President, te n’e automobilistanan cu tabata
para cant’i caminda pa cuminda e mandatario.
A reina un ambiente masha agradabel, mientras cu a papia riba kico tur e
bario tin mester.

Durante e bishita aki, Prome Minister Mike Eman semper ta haya guia di
algun persona di e bario mes pa mustr’e e situacion, pero tambe compañ’e
den e bishitanan. Den e caso di e siman aki na Madiki, Premier Eman a
cana hunto cu Javier Hoek, Lionel Eleonora y Erwin Kemp. Aunke e bario
ta uno caminda ta reina un bida trankil, habitantenan a indica Minister rib’e
necesidad di un parkeerplaats p’e scol p’asina mayornan por baha y busca e
muchanan di un manera mas sigur.
Tambe tin algun caya cu mester di asfalt, mas ainda, den temporada di
awacero. E mandatario tambe a accepta invitacion di miembronan di kapel
di Madiki pa ayudo cu algun trabou chikito. Cierto habitantenan a haya
asistencia di Serlimar pa benta sushi grandi afo. Casonan di asistencia
social, tambe a keda registra pa percura pa nan debido coordinacion dor di
e departamento BoBario, entre otro.
Accion di Bario ta keda vigente como un canal pa medio di cual Prome
Minister Mike Eman y su Gabinete ta haya contacto directo cu pueblo.
Manera Premier Eman mes a expresa:
“Nos ta contento di por a scucha tur e ciudadanonan cu nos a topa awe. Dor
di scucha e necesidadnan aki nos por haci cambionan. Nan por ta sigur cu
nos no solamente a mira y registra, pero cu trabounan ta wordo haci mescos
cu a sosode den otro barionan.”