Page 56 - MIN ON 7 APRIL 2016
P. 56
PAPIAMENTO DI DOS GRADO
IPA a tuma nota di un articulo cu a sali den corant Diario tocante e estudio Papiamento di di dos grado. Nos a
haya cu ta na su luga pa informa tocante e palabracion cu tin cu Minister y e procedura cu ta tumando luga pa
por cuminsa cu un estudio nobo. Nos ta haya esaki prudente mirando cu IPA no a haya oportunidad pa
reacciona prome cu e articulo a wordo publica.
Pa cuminsa c’un estudio cu ta subsidia completo of parcial door di gobierno mester cumpli cu un procedura.
Meta di e procedura ta:
– Pa garantisa calidad
– Pa cumpli cu e proceduranan vigente di Pais Aruba tocante enseñansa
– Pa duna transparencia over di institutonan involvi, tomo di decision y condicionnan cu mester cumpli
cune.
E procedura ta lo siguiente:
Mester entrega un peticion na Minister di Enseñansa cu nos kier cuminsa cu un estudio y mester indica
pakico e estudio ta necesario, p.e. e necesidad y scarsedad di docente y e interes di studiante pa sigui e
estudio ta importante. Mester traha riba un projectdossier y presupuesto. Despues di aprobacion ta sigui
prepara y ofrece e estudio.
Den e caso di Papiamento diferente grupo den comunidad a acerca IPA, p.e. Fundacion Lanta Papiamento y
docente cu ta mira cu tin necesidad den enseñanza pa docente di Papiamento.
Un di e rekisitonan pa por cuminsa cu un estudio ta e cantidad di studiante cu ta interesa pa sigui e estudio.
Pa sa si tin interes pa e estudio aki, IPA a sondea e interes bou di studiante durante e Dia Publico di IPA. E
interes tabata basta grandi.
IPA a informa Minister y nos a haci palabracion pa e siguiente pasonan. IPA ta haci un sondeo di e mercado
di labor pa haya sa kico ta e necesidad na docente Papiamento di di dos grado. IPA mester informa Minister
di e sondeo ora cu esaki ta cla. Despues di aprobacion di Minister pa sigui cu e preparacionnan, a base di e
sondeo, ta entrega un projectdossier cu presupuesto pa e estudio.
Minister ta yega na un decision a base di consehonan cu e haya.
Concluyendo, IPA ta trahando riba e pasonan necesario pa por cuminsa cu e estudio. Una bes tin tur e
informacion, IPA lo entrega un peticion formal na Minister. E paso aki ainda no a wordo tuma pues e ponencia
cu algo no a wordo aproba of cualkier otro conclusion no ta cuadra cu e realidad.
