Page 64 - MIN VOS SEPT 18, 2015

Pa e luna di Augustus Nataly Montanes ta “Empleado di Luna” na
Hospital
Friday, 18 September 2015 09:06
Comparti

Pa luna di augustus 2015, gerencia di Dr. Horacio E. Oduber Hospitaal a ricibi atrobe hopi nominacion pa
e distincion di “Empleado di Luna”. Esun cu a destaca e biaha aki entre e nominadonan tabata Nataly
Montanes, kende ta miembro di e team chikito encarga cu Bestuurlijke Informatie Voorziening (BIV).
Informatie Manager señor Stefan Lucas a splica cu Nataly, kende ta un graduado di Universidad di Aruba
su facultad di accounting, finansa y mercadeo (FEF) tin cuater aña trahando na hospital y su
contribucionnan ta hopi valioso. E ta un persona cu ta gusta traha y ta tuma iniciativa pa participa y
organisa diferente proyecto.
Nataly Montanes ta traha e “rapportages” cu hospital ta uza pa maneha procesonan y facilita e cuido di
pashent, tambe el a traha riba e maneho financiero di e proyecto di Cardiochirurgie. Un otro proyecto
importante cu Nataly tabata encarga cune tabata e calculacion di prijsnan (“kostprijzenberekening”) cu ta
duna hospital un bista den e parti di cuanto e cuido ta costa hospital y cuanto mester cobra.
Caracteristicanan di Nataly Montanes, segun señor Lucas, cu ta wordo hopi aprecia, ta su forma
independiente y responsabel pa traha y su disponibilidad pa tuma responsabilidad pa cierto proyectonan
y trabao, cual pa e team chikito di BIV ta hopi importante.
E departamento ta birando dia pa dia mas importante. Ta pa hopi tempo caba den e mundo medicina,
internacionalmente tambe, tin e necesidad pa informacion corecto y util y den e parti aki e departamento
di informacion di hospital ta hacienda un bon trabao. Particularmente por nota cu e departamento aki tin
e credibilidad y tin bon cooperacion entre e team y e dokternan. Hospital ta spera di por conta cu Nataly
Montanes pa hopi tempo mas como un di e miembronan di e team aki.
Nataly ta un persona cu hopi zjeito, ta un placer pa traha cune y coach e; e ta un persona cu no ta wak
holoshi, pero tambe e ta laga sa di biaha si e por of no por traha cierto orario extra of adapta, asina señora
Virginia Tromp di departamento di Projectbegeleiding a comenta.
Nataly, sorprendi y cu sonrisa grandi a ricibi e reconocimento como Empleado di Luna di Augustus 2015
for di Director Financiero di Hospital señor Theo de Kool.

http://www.24ora.com/local-mainmenu-5/99652-pa-e-luna-di-augustus-nataly-montanes-ta-empleado-
di-luna-na-hospital