Page 12 - MIN TTC 30 MAART 2016

Minister di Turismo lo mester ta envolvi pa obtene un licencia pa opera un
hotel!

Publication: Tuesday, 29 March 2016. Categoria: General

Den futuro, segun Minister Otmar Oduber:

ORANJESTAD (AAN) – E dunamento di tereno na promotornan di hotelnan cu no ta trece e tipo di turismo cu
Gobierno y ATA ta boga pe, ta den discusion internamente den seno di Conseho di Minister.
Esey por a compronde for di Minister Otmar Oduber, Titular di Turismo, Transporte, Cultura y Sector Primario,
diaranzon ultimo.
E dignatario a menciona cu nan tin cu dicidi sea sigui den e direccion di producto di calidad cu henter e Gabinete
Eman II ta propaganda, of nan tin cu cambia di estrategia.
Esaki den sentido cu tin un ley di “All Inclusive” den Parlamento y cu e dignatario ta spera cu nan lo aprobe pronto,
pasobra tin amenaza tambe riba propiedadnan cu tin interes di hende pa wordo cumpra, pa sigui desaroya mas
camber tur cos inclui na Aruba.
E dignatario a duna di conoce cu den esaki, un di e aspectonan cu tambe lo cambia ta cu, den futuro, pa por haya
licencia pa opera un hotel na Aruba, e Minister di Turismo tambe mester ta envolvi.
Minister Otmar Oduber a señala cu tin un ley entre 70 pa 80 aña bieu, unda ta bisa cu e Minister di Salubridad
mester firma; pero e ley ta asina bieu cu e unico exigencia pa un hotel vergunning te cu awe, ta cu bo mester cumpli
cu higiene den baño y den cushina.
“Nada mas ta wordo midi pa bo haya un hotel vergunning. Y awor nos ta cambie cu e ley cu tin na Parlamento, na e
momentonan aki, unda cu e minister di turismo tambe ta envolvi y ta evita tambe cu terenonan ta wordo duna sin
mas, sin tene na consideracion e maneho turistico-economico cu ta wordo hiba den e pais”, e dignatario a acentua.
E mandatario a menciona tambe cu e no tin detayenan tocante e proyectonan menciona pero e lo sinta cu tanto
Minister Presidente como cu Minister di Infrastructura, pa analiza ki permiso nan tin, ki tempo nan ta haye y bao di
cual condicionnan.
E tin entendi cu nan a haci expansion tambe y nan mester ta conciente cu nan por a haya e tereno, pero den e ley
nobo nan mester tin aprobacion adelanta pa por realiza un tipo di acomodacion asina, na Aruba.
E ley aki ta abarca otorgamento di permiso pa hotel, condominium y apartamento riba nos Isla.

http://www.diario.aw/2016/03/minister-di-turismo-lo-mester-ta-envolvi-pa-obtene-un-licencia-pa-
opera-un-hotel/