Page 39 - MIN.SJA APRIL 17

Minister Boekhoudt cu bishita di trabao na De Nieuwe Kans
na Rotterdam

Thursday, 16 April 2015 10:44
Comparti

Minister Plenipotenciario Alfonso Boekhoudt a haci un bishita di trabao na e fundacion De Nieuwe Kans
na Rotterdam. E fundacion aki ta un organisacion cu ta brinda terapia durante di dia na hobennan mayor
di 18 aña, cu activamente kier traha na mehoracion di nan situacion.
Tin coachnan individual cu ta yuda e hobennan pa cambia y drecha nan bida. Finalmente ta e hoben mes
lo mester haci esaki, pero nan mester compronde cu esaki ta nesesario.
E mandatario a wordo ricibi pa e director di De Nieuwe Kans Piet Boekhoud. Sr. Boekhoud a duna un
splicacion ariba e hobennan cu ta haya guia na De Nieuwe Kans. Hopi di nan ta hoben cu problema: of
nan no a caba scol, no tin trabao y asina nan no tin ningun afiliacion cu e comunidad den cual nan ta
biba. ‘Nos ta purba na dunanan curso y training pa asina nan por bai scol bek of haya un trabao. Nos tin
contacto cu doñonan di trabao cu ta dispuesto pa yuda y duna e hobennan aki un chens pa traha,’ asina
sr. Boekhoud a bisa.
Daniel de Wolf ta traha pa casi diez aña cu hobennan for di Curaçao y Aruba. Segun sr. De Wolf tin algun
di e hobennan aki a bin for di Curaçao y Aruba, otronan a nace na Hulanda. ‘Hopi di e hobennan aki tin
un stafblad y nan tin debe. Nan problemanan ta hopi compleho. Pesey ta un satisfaccion ora cu nos mira
cu e hobennan ta logra. Nos tabata tin un hoben Arubiano cu a drenta cerca nos cu hopi debe. Awor ela
pasa e trayectoria di training, e ta traha y hasta e tin un trabao fiho,’ Daniel de Wolf ta conta.
Despues di e presentacion minister Boekhoudt a haya un guia di e localidad pa e Arubiano Roy Lints cu
ta traha na De Nieuwe Kans. Sr. Boekhoudt a probecha di e oportunidad pa encontra cu e hobennan. Di
nan banda nan tataba hopi interesa den e funcion di un minister plenipotenciario. E mandatario a duna
un splicacion cortico ariba su funcion y tambe ariba su persona mes. Esaki a keda aprecia pa e hobennan.
Na final Minister Plenipotenciario Alfonso Boekhoudt a gradici e director di De Nieuwe Kans y su staf pa
e bunita recepcion. ‘Mi a keda impresiona pa tende kico De Nieuwe Kans ta haci pa e hobennnan. Loke
boso ta haci ta hopi importante pa e hobennan, pero tambe pa e comunidad na Rotterdam. Ta bon cu e
hobennan tin un caminda unda nan por acudi y ricibi e ayudo nesesario pa saca nan for di nan situacion,’
asina Alfonso Boekhoudt a bisa.