Page 7 - AM210322

Dialuna, 22 Maart 2021 AWEMainta 7

Pa Travel + Leisure Global Vision Awards:

Aruba a wordo selecta como lider

den sostenibilidad pa turismo

DURANTE luna di januari 2021 – CEO di Aruba
Tourism Authority Ronella Croes a wordo entrevista
dor di e conocido escritor Jeff Chu cu ta entrevista y
skirbi pa e famoso Travel + Leisure.
Basa na New York City, Travel + Leisure ta un revista
di biahe y ta wordo publica 12 bes pa aña cu 4.8 miyon
persona cu ta leza e revista mensual aki.

Como resultado di e entrevista, Aruba a wordo selecta
pa un Travel + Leisure Global Vision Award 2021 como
un di e tres destinacionnan liderando pa un turismo
sostenibel. Entre e tres destinacionnan ta New Zealand
(Oceania) y Faroe Islands (Dinamarca – Europa).
Den su articulo ‘3 Destinations Leading the Charge
for Sustainable Tourism’ Chu ta cuminsa su storia cu
“E destinacionnan cu ta ricibi e honor e aña aki den e
Global Vision Awards ta tumando medida pa proteha
nan pais y nan comunidad p’e futuro generacionnan di
bishitantenan y pa nan residente.”

E ta enfoca con Aruba a prohibi e solo uzo di
articulonan di plastic y a prohibi e importacion y uzo di
e ingredientenan octinoxate y oxybenzone, cu ta wordo
uza den cremanan antisolar cual cremanan ta dañino na
nos medio ambiente marino. Ademas e ta nota cu nos
isla ta dedica ambiciosamente na e asina yama ‘energia
limpi’ unda por mira entre otro con nos Aeropuerto
Reina Beatrix awor su area di parkeo ta e instalacion
mas grandi di panelnan solar riba nos isla.
Tambe Chu ta papia con Aruba a desaroya un plan
amplio pa cu un desaroyo sostenibel pa nos destinacion
y con nos a identifica areanan di nos isla cu no por haya/
crece mas den turismo, pero con nos a crea un stategia
pa otro aeranan cu si por ricibi mas turista/crece mas
den turismo. P’esnan interesa den e storia ineresante aki
por leza mas riba e website di travelandleisure.com.