Page 53 - flip min.vos

Den sector priva tin un tendencia pa e porcentahe di AO sigui baha

Publication: Monday, 2 March 2015. Categoria: General

Aña 2014 a cera cu 2.52% absentismo:

ORANJESTAD (AAN) – Den entrevista cu Matutino DIARIO, Ir. Edwin Jacobs a duna
informacion tocante e situacion di AO, tanto den sector priva como den sector publico.

Ir. Jacobs a señala cu SVb a kere cu na aña 2013, a yega e nivel mas abao cu nan por a logra
tocante e porcentahe di absentismo pa motibo di malesa den sector priva, pero esey no tabata e
caso; durante 2015, el a sigui baha.

Aña 2014 a cera cu un porcentahe di 2.52 porciento, loke ta nifica cu pa cada cien dia di trabao
2.5 dia e trahador no a presenta na e trabao promedio pa motibo di malesa (AO), locual ta un
cifra hopi abao, internacionalmente.

“Por mira tambe cu for di 2009 padilanti, na momento nos a cuminza sinti e efectonan mas fuerte
di e crisis financiero riba Aruba, tambe e cifranan tabata bahando y na aña 2010 e absentismo
tabata 2.90 porciento, y el a keda baha tur aña te awor cu ta 2.52 porciento”. Ir. Jacobs, director
di SVb a indica cu esaki ta trece cune cu e gastonan di e fondo tambe a reduci, aunke no mucho
pero si casi mey miyon florin, y mester tene cuenta cu aña pasa ora a cuminza yobe bastante y cu
tabata tin casonan di dengue y chikungunya, esaki a aumenta un poco e gastonan y dianan di AO.
Pero asina mes, e cantidad di dianan di AO a keda abao.

“No por bisa cu e fondo di malesa nos por trece bek den balansa financiero door di baha e nivel
di AO, pasobra e ta hopi abao caba pues mucho mas cu esey no por bahe, y mester bay busca
solucion na aumenta e entrada na e fondo di malesa.

“Nos a presenta diferente opcion na gobierno e por nifica un aumento di prima relativamente
chikito, pasobra e deficit tampoco ta grandi. Y si gobierno sigui cu su plan di exoneracion di
debe entre e fondonan, locual nos ta haye positivo y aumento chikito di prima e lo por bay yuda”,
director di SVb a subraya.

http://www.diario.aw/2015/03/den-sector-priva-tin-un-tendencia-pa-e-porcentahe-di-ao-sigui-baha/