Page 12 - AM211008

12 AWEMainta .com Diabierna, 08 October 2021
Peaton herida dor di in hit & run,

mester a warda casi 1 ora riba ambulance

Diaranson anochi pa 6:50 algun persona den area di
Tao Bao a scucha un zonido poco duro, n’e momento ey
no tabata sa kico a pasa. Algun rato despues a mira cu
auto a dal un peaton.
Locual a sosode ta cu varios persona a mira esaki y a duna
Polis di Trafico cu a presenta n’e sitio tur informacion.

N’e sitio por a scucha diferente testigo, cada un a duna
nan version. Un dama, kende lo a mira kico a sosode
a conta Polis cu e peaton lo a cruza caminda di zuid
pa panort. Un auto color cora maneha pa un cabayero
hoben lo t’esun cu a dal e homber.
Dos number di auto a wordo duna na Polis, unda cu
e vehiculo ta wordo localisa mas laat den oranan di
anochi.

Despues cu e auto a dal e peaton e chauffeur a baha
y bay mira e peaton benta abou y a bise algo, esaki ta
informacion obteni n’e sitio dor di testigo.
E testigo a sigui conta cu despues cu e homber a bisa e
peaton herida algo, a subi e auto y ta bandona e sitio.

UN ORA

E parti cu a bay completamente for di man t’e hecho
cu e peaton a keda un ora largo den e mesun posicion
banda di caminda “benta”.

Famia a yega y mester a mira nan ser stima den e
posicion fastioso y sin ningun hende por a haci algo.
Na varios ocasion e agentenan di trafico presente a
puntra con leu e ambulance tabata, y aparentemente
dos cu tabatin e momento ey a bay Calabas unda un
ciclista a bira malo.
Paramediconan lo tabata bezig eynan cu CPR.

Den careda di 7:50 p.m ambulance a yega Shiribana y
den algun minuut a prepara e peaton p’e bay Hospital.