Page 12 - AVP

Al contrario nos fraccion ta di opinion cu si e plan aki tabata asina bon manera sr Tjon ta
pretende cu e ta, nos ta sigur cu Hulanda y CFT lo duna nan aporte n’esaki sin pensa dos
bes pero e posibel ‘aanwijzing’ ta mustra net lo contrario.

Mi persona ta kere cu e lider di fraccion di MEP no mester cuestiona e maneho di nos
Gobierno p’e situacion social, ya cu desde cu Gabinete Wever Croes a asumi mandato di
nos pais na 2017, e situacion social a drenta den crisis dor di tantisimo medidanan cu ta
saca placa directo for di cartera di nos pueblo.

Contrario n’esaki Gobierno di AVP na 2009 a tuma como un di su prome decisionnan, di
pone fondo disponibel, e.o. e ‘reparatietoeslag’ pa yuda esnan di poco entrada, haya un
espacio financiero pa nan por haci algo mas cu nan entrada.

Nos Gobierno a aumenta onderstand, a aumenta salario minimo, a duna esnan cu poco
entrada placa pa scol, a drecha scolnan rond Aruba invirtiendo miyones di florin pa
mucha y hobennan haya un bon educacion.

Gabinete Wever Croes den casi dos aña di tempo a pasa ranca tur esaki for di mesun
hendenan aki, castigando pueblo cu medida cu practicamente a anula tur e incentivonan
cu Gobierno di AVP a duna na pueblo caminda cifranan concreto di CBS ta confirma
esaki tambe cu tin un inflacion di cuminda di 12%.

Ta dificil pa Wyatt-Ras por cumpli cu peticion di Rocco Tjon pa sostene un plan di crisis
social caminda su ehecucion no ta bay manera mester ta.

Parlamentario Mervin Wyatt Ras ta pidi colega Tjon pa bin para bandi dje y cuestiona
Minister p’e yega na bon ehecucion di e plan enbez di ciegamente defende.