Page 9 - AHATA

2 LOCAL AWEMainta
Con siguridad di cuminda lo
mustra na Aruba berdaderamente
RIBA superficie, no ta parce cu Aruba tin insiguridad di
cuminda. Supermercadonan ta yen. Restaurantnan ta druk.
Turistanan ta come bon. Pero bou di e superficie ey, hopi
famia ta lucha pa pone un cuminda decente riba mesa.
Insiguridad di cuminda na Aruba ta real — e no semper ta
visibel.
Pues, con siguridad di cuminda berdadero lo mustra real-
mente riba e isla aki?
Laga nos cuminsa cu con e no ta mustra. E no ta mustra
manera dependencia riba 90% di cuminda importa. E no ta
mustra manera famianan cu mester scoge entre cuminda of
cos di scol. Y sigur e no ta mustra manera muchanan cu ta
bay scol sin desayuno.
Siguridad di cuminda real ta bay mas profundo cu solamente
disponibilidad. E ta nifica acceso, cu e ta pagabel, nutricion,
y autosuficiencia. Den otro palabra, no ta trata solamente di
e hecho cu tin cuminda — ta trata di si hendenan por hay’e,
por pag’e, y por beneficia di dje.
Cuminda pagabel y nutritivo pa tur hende
Den un Aruba cu berdadero siguridad di cuminda, ningun
hende ta bay drumi cu hamber — ni nos grandinan, ni
mayornan soltero, ni trahadonan indocumenta. E ta nifica
cu hendenan no ta biba di un salario pa otro djis pa alimenta
nan famia. E ta nifica tambe cu cuminda saludabel, y no djis
cuminda procesa, ta pagabel y accesibel den tur bario.
Nos mester laga e idea atras cu barata ta igual na sufici-
entemente bon. Siguridad di cuminda real ta duna prioridad
na nutricion, no solamente na barica yen.
Cuminda local, poder local
Aruba ta importa casi tur cos — fruta, berdura, productonan
lacteo, carni. Esey ta un riesgo enorme. Un retraso den
transporte maritimo, un crisis economico, of un crisis global
y nos ‘shelfnan’ por bira bashi lihe. Siguridad berdadero ta
nifica cultiva mas di nos propio cuminda aki.
Nos no mester di plantacionnan masivo — nos mester di
inversion den agricultura na escala chikito, hydroponics,
hardinnan comunitario, y educacion riba produccion di
cuminda. Ta trata di duna hende herment pa cultiva — y
balora — cuminda local atrobe.
Diamars, 21 October 2025
Sosten comunitario sin berguensa
Insiguridad di cuminda hopi biaha ta bin cu stigma. Hende
tin berguensa di pidi yudansa, di bishita banco di cuminda,
Rodekruis FPNC, of di admiti cu nan ta pasando den difi-
cultad. Un Aruba cu siguridad di cuminda lo tin sistemanan
di sosten fuerte y digno — banconan di cuminda, cuminda na
scol, iniciativanan pa comparti cuminda — cu ta normalisa
y respeta.
Comunidadnan mester sinti nan empodera pa cuida otro, no
sinti nan husga pa motibo cu nan mester di yudansa.
Maneho cu Ta mira cuminda como un derecho
E problema aki no ta solamente personal — e ta politico.
Aruba mester di un maneho di cuminda cla y a largo plaso
cu ta enfoca riba sostenibilidad, ekidad, y educacion. Esey
ta inclui miho financiamento pa nutricion na scol, sosten
pa agricultornan local, y strategianan nacional pa reduci
dependencia riba importacion.
Siguridad di cuminda no mester wordo trata manera caridad.
E ta trata di derechonan, resiliencia, y planificacion pa futuro.
E cuadro completo
Ora hende tin acceso sigur na cuminda, tur cos ta mehora
— salud, educacion, productividad, stabilidad familiar.
Siguridad di cuminda no ta djis un bunita idea. E ta e fundeshi
di un sociedad fuerte y husto.
Pues, e berdadero pregunta no ta con siguridad di cuminda
lo mustra na Aruba — e ta esaki:
Kico nos ta wardando pa haci’e un realidad?