Page 35 - Flip

Falta hopi ainda pa duna Papiamento e lugar mereci

Publication: Wednesday, 27 May 2015. Categoria: Politica
Booshi Wever di UPP relaciona cu oficializacion di e idioma

ORANJESTAD (AAN): Partido Union Patriotico Progresista na ocasion di e di 12 aña di
oficialisacion di nos idioma Papiamento, kier a felicita nos comunidad pa e hecho aki, pero na e
mes momento mustra cu apenas esey ta e comienso di un trayectoria largo pa duna Papiamento e
lugar cu e merece den nos comunidad y den nos bida diario.
UPP den su Programa Electoral di 2013, como un partido cu a profila su pensamentonan como
un partido cu ta pro Arubianisacion y pro Integracion di esnan cu ta haci di Aruba nan patria
nobo, a mustra claramente e rol cu nos ta kere cu Papiamento mester tin den henter e proceso aki.
Lamentablemente nos tin di bisa, cu keto bay, Papiamento no ta haya e atencion cu e merece,
particularmente ni for di gobierno, ni for di Parlamento.
Den e cuadro di Arubianisacion aki ta necesario pa reconoce e rol di Papiamento den nos sistema
educacional. Den cuadro di e desaroyo intelectual di nos muchanan, ta necesario pa nan siña
pensa y comunica den nos idioma como punto di salida, pa despues sigui desaroya nan mes den
otro materianan y otro idiomanan.
Di e manera aki nos ta crea tambe e Arubiano critico, y cu por expresa su opinion, sin tin nodo di
laga otronan haci esaki p’e, loke cu lamentablemente tur dia nos ta mira ta tumando lugar.
UPP ta na fabor pa no unicamente Papiamento forma parti di nos sistema educacional como
idioma di instruccion, pero mester amplia esaki na nivel universitario, pa asina no solamente haci
mas investigacion riba nos idioma, sino tambe pa nos por tin e herment necesario pa asina nos
por traha na profesionalisacion di nos maestronan riba tanto e materia di Papiamento mes, pero
tambe pa e maestronan por haci uso di Papiamento como idioma di instruccion general den nos
enseñanza.