Page 36 - Flip

Papiamento mester bay hunga un rol hopi mas importante y prominente den nos enseñanza,
birando asina e idioma di instruccion na schoolnan basico, mientras Hulandes, Ingles y Spaño lo
mester worde duna como idiomanan di materia obligatorio (“verplichte vakken”).

Den concepto di UPP Hulandes ta birando poco poco mas bien un estorbo den educacion di nos
yiunan. Hulandes como idioma di instruccion ta basa riba un sistema colonial cu no ta funciona
mas pa nos generacion actual. Hulandes ta un idioma di school, pero cu no ta biba den
comunidad. Rond di 6% di nos comunidad tin idioma Hulandes como idioma na cas.

Te cu awor ta trata e idioma aki na school comosifuera e ta idioma materno di nos muchanan cu
tur e consecuencianan cu esaki ta trece cu ne. Lo mester enfoca mas riba e lugar di e idiomanan
den nos enseñanza. Pa hopi tempo caba nos por mira cu e rol di Hulandes den nos bida diario y
cotidiano ta desapareciendo, mientras cu Ingles y Spaño ta bira mas importante. Y UPP ta kere
cu Papiamento, den tur esaki mester ta instrumental, pa ta e forza catalisador entre e idiomanan
extranhero aki, y hustamente lo mester contribui na e integracion cu tanto Aruba tin mester.

E rol di Hulandes ta keda refleha tambe, na momento cu nos mandatarionan ta firma acuerdonan
cu Hulanda, den idioma Hulandes, y cu despues ta resulta cu interpretacionnan ta varia y pueblo
ta sinti di ta worde duna un 6 pa un 9. Ya cu idioma Papiamento ta oficial, mester bira un
exigencia cu documentonan cu ta worde redacta na Hulandes ora di yega na acuerdonan
importante asina, tin tambe su ekivalente den nos idioma Papiamento. Pues, tin un caminda largo
ainda pa bay!

http://www.diario.aw/2015/05/falta-hopi-ainda-pa-duna-papiamento-e-lugar-mereci/