Page 48 - MIN ON 21 OCT 2015

Rudy Geerman, ex Presidente di FTA, a expresa cu nan a demostra demasiado pasenshi. Y ta
lamenta e forma con Tuyo Werleman a bay television yora, yamando e trahadonan pa
iresponsabel pa laga e clientenan sin haya servicio.

“No mester solamente culpa nos. Pero mira di con nos a yega asina leu di no duna servicio. Na
prome instante, gerencia di SVGA tin obligacion di paga e trahadonan. Pa colmo, Tuyo si a
cobra su sen. E si a percura pa e haya su placa, y despues cu el a cobra, e ta bisa cu nos no mester
cobra. Esey tin e trahadonan malcontento.”

Segun Geerman, a sinta cu gerencia ora cu a tende cu e stichting no kier paga y a worde bisa cu
ta Gobierno no a manda e placa. Pero a informa nan cu sindicato no tin acuerdo cu Gobierno sino
cu e stichting. Apesar di esey toch a bay cerca Gobierno pa busca soluciona, aunke no ta nos
responsabilidad.

Pero Gobierno a bisa cu e placa a worde manda caba pa gerencia. Pero asina mes ta para ariba cu
nan no ta paga. FTA a busca alternativa y a sugeri pa paga e trahadonan 50% y despues di e caso
den Corte ta paga e otro 50%. Pero tampoco nan a bay di acuerdo cu esaki. For di diabierna
merdia a bisa nan cu si no paga ta para e trabao dialuna.

Gerencia a bisa di ta dispuesto pa sinta na mesa, locual FTA tambe ta di acuerdo, pero no ta mira
movecion. FTA a expresa cu nan lo keda para te ora yega na un solucion.

http://www.diario.aw/2015/10/trahadonan-di-bibito-pin-den-accion-atrobe-ayera/