Page 20 - AWEM

20 AWEMainta Diahuebs, 12 November 2015

IBiSA ta organisa
‘Supermarket
Tour’ y caminata
pa conmemora Dia
Mundial di Diabetes

TUR AÑA Dia Mundial di Diabetes ta riba 14 di november y en conexion cu

esaki IBiSA conhuntamente cu Plataforma Promocion di Salud ta organisa
un supermarket tour y un caminata cu tin como meta pa informa y duna
guia n’e diabetico con pa cumpra mas saludabel den supermercado y ofrece
e oportunidad pa haci actividad fisico.
Si bo mes of un familiar ta diabetico (sucu, sucu den sanger, malesa di sucu),
ta exigi pa bo haci un cambio den bo sistema di biba.
Mester come mas saludabel y mester haci mas actividad fisico. No ta facil
pa un persona cu ta diabetico, saca’fo cua alimento/producto ta bon y cua
ta menos bon pa cumpra.
Pensando riba e situacion aki, IBiSA y Plataforma Promocion di Salud ta
brinda e oportunidad pa haya sa mas di con pa haci escogencianan mas
saludabel ora ta cumpra den supermercado.

Profesionalnan den salud, entre nan nutricionista y dietista di IBiSA,
Departmento di Salud Publico (DESPA), Instituto Medico San Nicolas
(IMSAN) y Hospital ta presente durante e siman di 9 pa 13 di november
2015 na diferente supermercado pa comparti nan conocemento y contesta
preguntanan tocante alimentacion y diabetes.
E supermarket tour ta dura entre 30 pa 45 minut y ta Completamente Gratis.
Si bo ta interesa pa participa na un di e tournan aki, bo por reserva bo lugar
yamando na IBiSA telefoon 582 4987 of via email: ibisa.aruba@gmail.com.
Cupo ta limita, pa cual ta haci un peticion pa yama y sigura bo lugar.

Caminata “Bida ta Dushi”:
E caminata ta tuma lugar diasabra dia 14 di november 2015 y ta sali
exactamente pa 6:30 di mainta. Salida y yegada ta na Compleho Deportivo
Libertador Betico Croes na Sta. Cruz y e ruta ta cubri un distancia di 6Km.
Participacion n’e caminata ta completamente gratis. No mester inscribi pa
participa, djis yega tempran! Bin cu bo T-Shirt blau y participa hunto cu nos.

E invitacion cordial ta pa participa na tur dos actividad y asina contribui y
engrandece e conmemoracion di Dia Mundial di Diabetes.