Page 33 - MIN.ON JAN 20,2015 revised

Riba e pregunta cu si e Minister ta al tanto di e publicacionnan cu a haci insinuacion falso contra
su persona, el a contesta cu si, cu esaki ta un di varios publicacionnan di un medio
di comunicacion no independiente. Minister Hooyboer a manda tur e documentonan
corespondiente na e destaho publico na Parlamentario Wever-Croes, pa e mes sigui di cerca con
ta tene un destaho di berdad. A saca un aviso dia 6 di november 2014 den mayoria corant, den
cual ta invita tur compania di seguro interesa pa participa. Separa di e aviso, Cas di Aruba na
Hulanda a manda un carta separa pa informa e companianan ONVZ, Boogaard y Meeus di e
destaho publico.

Den e carta di contesta di Minister Michelle Hooyboer na Parlamentario Evelyn Wever, el a
manda copia di e conseho cu e comision a formula pa e mandatario, basa riba e hecho cu e
compania InsureToStudy, bao di e asegurado Europeesche Verzekerings Maatschappij N.V. a
ofrece e oferta mas abao, cu un suma di inscripcion di € 36,30 mensual pa cobertura di seguro di
salud y dekking ZIP. InsureToStudy tambe ta ofrece un pakete pa studiantenan cu kier traha na
un balor di € 75,87 pa luna.

Minister Michelle Hooyboer a splica cu e informacion di 28 mil studiante sigura ta un
informacion divulga dor di e compania mes, InsureToStudy BV, y cu esaki ta encera e total di
studiantenan internacional cu ta sigura na e empresa aki. Esaki no tin di haber cu e total di
studiantenan di Aruba cu ta studia na Hulanda manera ta publica den un solo corant. Un di e
tantisimo mentiranan cu a wordo publica, y mas ainda, un blunder grandi mirando cu no ta ni
existi 28,000 studiante di Aruba na Hulanda! InsureToStudy ta resorta bao di e compania Jonker-
Schotte Assurantiebedrijf BV, funda na aña 1985 y cu despues a wordo hinca den un BV separa
na November 2014. Jonker-Schotte Assurantiebedrijf BV ta un compania cu ta resorta bao di e
holdingJonker-Schotte Adviesgroep, funda desde aña 1951. E website
(www.arubastudent.com) ta specialmente traha pa studiantenan Arubano. Ta di comprende cu e
website no por ta den funcion prome cu sikiera haya e conocemento di a gana e destaho publico.

Riba e pregunta cu pakico Minister a tuma un posicion di no refuta e alegacionan haci den cual ta
tilda e mandatario di fraude, Minister Michelle Hooyboer a manda copia di carta di su abogado
cu a bay den direccion di e corant Solo di Pueblo. Segun etica di profesion, cu cualkier periodista
ta atene su mes na dje, lo mester a tuma contacto cu e Minister concerni prome cu publica un
articulo. Esaki por wordo haci via telefon, email of den cualkier otro forma, pa verifica
e informacion prome cu publicacion. Segun e mandatario, ta falta di etica y ta bergonsoso e
hecho di publica y tilda un persona di fraude, siendo cu esaki no a wordo verifica y despues reta
e persona pa desmenti e ponencia aki. E unico manera pa reacciona debidamente ta recori na
instancianan legal pa refuta esaki. Loke e mandatario a haci tambe segun su informacion
suministra.

Pa loke ta referencia di studiantenan cu no ta sigura, e mandatario ta enfatisa cu te na e
momentonan aki Aruba Huis no ta na altura di ningun caso di studiantenan cu no ta sigura. En
caso cu ta berdad cu tin un caso di un no asegurado, Aruba Huis lo ta e instancia indica
pa resolve esaki debidamente. Parlamentario Evelyn Wever a puntra cua ta e rol cu e casa di
Minister of su compania di seguro ta hunga den e destaho publico y/o den e empresa
“InsureToStudy B.v.”? E mandatario a contesta masha cortico, ningun rol.