Page 34 - MIN.ON JAN 20,2015 revised

Na final, Minister Michelle Hooyboer a probecha di e momento aki, aunke cu e sa cu
normalmente ta Parlamento ta haci pregunta na Minister, pero cu e kier uza su
derecho como ciudadano di Aruba - pa haci pregunta dirigi na Evelyn Wever-Croes como
representante di pueblo den Parlamento. Como tal Minister Michelle Hooyboer-Winklaar ta haci
uzo di e derecho ey y ta spera di ricibi un contesta mesun lihe cu el a contesta e
Parlamentario. Tambe e mandatario ta invita Parlamentario Evelyn Wever-
Croes pa bishit’e personalmente na su oficina of sino e lo por haci un bishita na
Parlamento tambe p’asina por combersa ampliamente riba cualkier pregunta cu tin di banda di su
persona pero tambe di banda di e mandatario.

Minister Hooyboer ta puntra Parlamentario Wever si e conoce of tin cualkier contacto cu e
director of otro representante di Boogaard Assurantien, e compania cu pa 20 aña largo a mantene
e seguro di studiante sin un destaho publico? Si e Parlamentario ta interesa solamente den seguro
di studiante of tin cualkier pregunta tocante otro seguronan cu Gobierno tin? Si e Parlamentario
ta di opinion cu lo ta mas transparente pa Gobierno haci un destaho publico
riba tur otro seguro tambe?

Na final, awor cu a sali na cla segun e mandatario, cu e ni su famia no tin ningun beneficio
relaciona cu e seguro di studiante y e compania cu a gana e destaho a haci esaki legalmente y
tambe cu tur studiante ta sigura y finalmente cu studiantenan lo paga menos pa nan seguro, e ta
puntra kico ta opinion di Parlamentario Evelyn Wever riba e cambio di seguro.

Minister Michelle Hooyboer ta subraya cu el a contesta e preguntanan riba e mesun dia cu el a
ricibi nan y ta spera di por conta cu e mesun eficiencia di Parlamentario Evelyn Wever, cu a uza
noticianan tendencioso di un corant no independiente y via un columnista cu a aparece riba un
lista politico den ultimo eleccion como su fuente pa haci preguntanan oficial na un mandatario di
nos pais.

http://noticiacla.com/news/2107